علیم صبا نویدی
پارسائی حضور کا صدقہ
یہ کمائی حضور کا صدقہ
میرے لب پر ہیں نور کے دانے
لب کشائی حضور کا صدقہ
مجھ کو منزل کا راستہ جو ملا
یہ بھلائی حضور کا صدقہ
میرے گھر میں مہک ہے نورانی
انتہائی حضور کا صدقہ
تم نے سمجھا ہے کالی کملی جسے
یہ رضائی حضور کا صدقہ
میں ہوں محتاج بارگاہ حبیب
فن رسائی حضور کا صدقہ
کل تلک میں غموں کا قیدی تھا
ہے رہائی حضور کا صدقہ
شاعروں میں صبا شمار ہوا
یہ گدائی حضور کا صدقہ
