غیر منصفانہ وقف قانون کے خلاف دراوڑ تہذیب بھی سینہ سپر

     اسانغنی مشتاق رفیقی، وانم باڑی

جنوبی ہندوستان میں کئی اعتبار سے مضبوط سمجھی جانے والی ریاست تمل ناڈو کی موجودہ دراوڑامنیٹرا کژگم کی سرکار جس کی قیادت وزیراعلیٰ ایم اسٹالین کر رہے ہیں اول روز سے موجودہ مرکزی سرکار کی صف اول کی مخالف اور اس قول و عمل سب سے بڑی ناقد رہی ہے۔ حالیہ دنوں میں دو ایسے واقعات پیش آئے جس نے مرکزی سرکار اور ریاست تمل ناڈو کی سرکار کو ایک بار پھر آمنے سامنے کر دیا۔ پہلے نمبر پر وقف ترمیمی بل 2025 ہے اور دوسرے نمبر پر گورنر کے اختیارت پر عدالت عالیہ کا فیصلہ۔ عدالت عالیہ کے فیصلے کے تعلق سے تفصیل میں جانے سے پہلے وقف بل پر مرکزی حکومت اور ریاست تمل ناڈو کے تصادم پر ایک طائرانہ  نظر ڈالتے ہیں۔

بھاجپا کی نریندر مودی سرکار نے وقف ترمیمی بل 2025 ، کو  کافی جدوجہد کے بعد بالآخر پارلیمنٹ کے دونوں ایوانوں سے پاس کراکے اس پر صدر سے دستخط کروا کر اس بل کو قانون بنا ہی دیا۔ آگست آٹھ 2024 اپنے تیسرے دور کے پہلے ہی سال میں اس نے یہ بل پارلیمنٹ میں پیش کیا تھا جس پر حزب اختلاف نے ایک بڑا ہنگامہ کھڑا کیا،  اس وقت کے حالات کو دیکھتے ہوئے حکومت نے اسے ایک جوائنٹ پارلیمانی کیمٹی بنا کر اس کے سپر د کردیا، تقریبا چھ ماہ بعد جنوری تیس 2025 کو کمیٹی نے اپنی رپورٹ پیش کی، جس پر حزب اختلاف نے پھر سے یہ الزام عائد کیا کہ اس کی کسی بھی بات کو بل میں شامل نہیں کیا گیا ہے، اس کے باوجود اقلیتی امور کے وزیر کرن رجیجو نےیہ بل 3 اپریل 2025 کو پارلیمنٹ میں پیش کردیا۔ پارلیمنٹ کے دونوں ایوانوں، لوک سبھا اور راجیہ سبھا میں لگ بھگ بارہ گھنٹوں سے زیادہ کی طویل گرما گرم بحث کے بعد حکومت اس بل کو معمولی اکثریت سے پاس کرنے میں کامیاب رہی۔ بحث میں حزب اختلاف کے ممبرآف پارلیمنٹ نے بڑھ چڑھ کر حصہ لیا اور حکومت کے خلاف مذہبی تقطیب اور مذہبی برادریوں میں تقسیم کا الزام لگایا۔ جب کہ حکومت اور اس کے اتحادیوں کا دعویٰ تھا وہ اس بل جسے اس نے امید کا نام دیا ہوا ہے، یونائیٹد وقف مینجمنٹ امپاورمنٹ ایفیشینسی اینڈ ڈیلوپمنٹ، کے ذریعے وقف قانون میں اصلاحات اور وقف املاک کا مناسب انتظام چاہتی ہے تاکہ غریب مسلمانوں کو اس سے فائدہ پہنچے۔

ریاست تمل ناڈو کی سرکار کا اول دن سے وقف ترمیمی بل کو لے کر  یہ موقف رہا ہے وہ  اس کے بہت سارے شقوں سے اس لئے اختلاف رکھتی ہے کہ وہ آئین میں دئے مذہبی اور انفرادی آزادی سے راست ٹکراتے ہیں۔ ریاست کے وزیر اعلیٰ ایم کے اسٹالین جو اپنی حکومت کو  دراوڑ ماڈل حکومت، جس کا بنیادی ہدف برابری اور ہمہ جہتی انصاف ہے، کے طور پر پیش کرتے ہیں، مرکزی حکومت کی اکثریت پرستی نظریہ کے سخت ناقدین میں شمار کئے جاتے ہیں۔ جے پی سی میں  بھی ان کی پارٹی کے نمائندوں نے اسی موقف کو بار بار پیش کیا اور پارلیمنٹ میں بل پر بحث کے دوران بھی یہی بات دہراتے نظر آئے۔ وقف ترمیمی بل کو آئین کے خلاف اور اقلیت مخالف قرار دیتے ہوئے ڈی ایم کے پارٹی کے ایم پی، اے راجا نے پارلیمنٹ میں بحث کے دوران  مرکزی حکومت کو آڑے ہاتھوں لیتے ہوئے کہا کہ یہ کیسی ستم ظریفی ہے، حکومت جس بل کو لے کر یہ دعویٰ کررہی ہے اس کے ذریعے اقلیتوں کا تحفظ کیا جائے گا خود ان کی پارٹی میں (دونوں ایوانوں میں) ایک بھی مسلم ایم پی نہیں ہےاور وہ ہمیں اخلاقی  مشورہ دے رہے ہیں کہ سیکولرازم کا تحفظ کیسے کیا جاسکتا ہے۔ انہوں نے اپنے بحث کی شروعات تمل ناڈو اسمبلی میں خود وزیر اعلیٰ ایم کے اسٹالن کی جانب سے پیش کر دہ قرارداد جو متفقہ طور پر منظور کر لی گئی تھی سے کیا جو کچھ یوں ہے ”  "پارلیمنٹ میں پیش کیا گیا وقف (ترمیمی) بل اقلیتوں کے حقوق کے خلاف، مذہبی آزادی کے منافی، غیر آئینی، وقف کے اصل مقصد سے متصادم، عدالتی فیصلوں سے ہم آہنگ نہ ہونے والا، غیر ضروری اور الجھاؤ کا شکار ہے۔ اگر اسے منظور کر لیا گیا تو یہ وقف اداروں کو مفلوج کر دے گا اور مسلم کمیونٹی کو نقصان پہنچائے گا۔ لہٰذا، اسمبلی مرکزی حکومت سے پرزور مطالبہ کرتی ہے کہ وقف (ترمیمی) بل کو مکمل طور پر واپس لیا جائے۔”  اس کے بعد آزادی سے لے کر اب تک کئے وقف ایکٹ میں ترمیمات کا حوالہ دیتے ہوئے اے راجا نے کہا کہ ان کا مقصد قانون میں اصلاحات تھا لیکن آپ کی حکومت  بہتری کے نام پر، وقف کے بنیادی تصور کو مٹانے کی کوشش کر رہی ہے، اور وہ اس قانون کے پردے میں تمام وقف املاک چھین لینا چاہتے ہیں۔ ان کے علاوہ ڈی ایم کے کے  ایم پی تروچی شوا نے اس بل کی مخالفت کرتے ہوئے الزام لگایا کہ ایک مخصوص کمیونٹی کو نشانہ بنایا جا رہا ہے،  انہوں نے کہا کہ یہ بل غیر سیکولر اور آئین کے منافی ہے۔

بل کے پاس ہوجانے پر تمل ناڈو کے وزیر اعلی ایم کے اسٹالن نے ریاستی اسمبلی میں فورا یہ اعلان کیا کہ دراوڑ منیترا کزگم (ڈی ایم کے) ‘متنازع’ وقف (ترمیمی) بل، 2024 کے خلاف سپریم کورٹ میں جائے گی، تمل ناڈو اسمبلی کی جانب سے 27 مارچ کو منظور کی گئی قرارداد کو یاد دلاتے ہوئے، مسٹر اسٹالن نے کہا: وقف ایکٹ 1995 میں مجوزہ ترامیم بھارت کی مذہبی ہم آہنگی کے لیے نقصان دہ ہیں اور اقلیتی مسلم برادری پر سنگین اثر ڈالیں گی۔ انہوں نے مزید کہا کہ مرکزی حکومت کو ان ترامیم کو مکمل طور پر واپس لینا چاہیے تاکہ آئینی اقدار، اقلیتوں کے حقوق، اور ملک میں فرقہ وارانہ ہم آہنگی کو محفوظ رکھا جا سکے۔ انہوں نے کہا کہ بھارت کی بیشتر سیاسی جماعتوں نے وقف (ترمیمی) بل 2024 کی مخالفت کی ہے۔ اس کے باوجود، یہ ترمیمی بل لوک سبھا میں منظور کر لیا گیا، جو کہ انتہائی قابلِ مذمت ہے۔ کل 232 ارکانِ پارلیمان نے بل کے خلاف ووٹ دیا، جبکہ 288 نے اس کے حق میں ووٹ دیا۔ اگرچہ بل منظور ہو چکا ہے، مگر اس کے خلاف ووٹ دینے والوں کی تعداد بھی کم نہیں ہے۔ اس ترمیمی بل کی صرف مخالفت نہیں ہونی چاہیے بلکہ اسے مکمل طور پر واپس لیا جانا چاہیے۔ اس پر تبصرہ کرتے انہوں نے مزید کہا کہ بھارت کی بیشتر سیاسی جماعتوں کی مخالفت کے باوجود، اور چند اتحادی جماعتوں کی حمایت سے، یہ بل رات تقریباً 2 بجے منظور کیا گیا۔ یہ بھارت کے آئین پر حملہ ہے۔ یہ ایک ایسا اقدام ہے جو مذہبی ہم آہنگی کو مجروح کرتا ہے۔ تمل ناڈو وقف (ترمیمی) بل 2024 کے خلاف لڑے گا، کیونکہ یہ وقف بورڈ کی خودمختاری کو کمزور کرتا ہے اور اقلیتی مسلم برادری کے لیے خطرات پیدا کرتا ہے۔ ہم لڑیں گے، اور ہم کامیاب ہوں گے۔

تمل ناڈو ریاستی اسمبلی میں وقف (ترمیمی) بل 2024 کی لوک سبھا میں منظوری کے خلاف بطور احتجاج، وزیر اعلیٰ، ان کی کابینہ کے اراکین، اور ڈی ایم کے و اس کی اتحادی جماعتوں کے اراکینِ اسمبلی نے ایوان کی کارروائی میں سیاہ پٹیاں پہن کر شرکت کی۔ وزیر اعلیٰ کی تقریر کی مخالفت کرتے ہوئے بی جے پی کے اراکینِ اسمبلی نے ایوان سے واک آؤٹ کیا۔

ریاستی سرکار کے علاوہ تمل ناڈو کی سیاست تیزی سے ابھرنے والے فلمی ادکار، ٹی وی کے کے رہنما نے بھی وقف (ترمیمی) ایکٹ 2025 کو چیلنج کرتے ہوئے سپریم کورٹ میں ایک عرضی دائر کی ہے۔

اس کے علاوہ ریاست کے اکثر سیاسی پارٹیوں نے مرکزی حکومت کی اس اقدام کی سخت مخالفت کی ہے اور مسلم جماعتوں کی جانب سے بل کے پاس ہونے کے بعد سے  جو احتجاج جاری ہے اس میں شریک ہوکر اپنی تائید پیش کر رہے ہیں۔ ریاست کے تمام مسلم سیاسی پارٹیوں، سماجی اورفلاحی تنظیموں کی جانب سے مسلسل مرکزی حکومت کے اس قانون کے خلاف ریاست میں بھر میں پرامن احتجاج کا سلسلہ جاری ہے جس میں ڈی ایم کے اور اس کے حلیف جماعتوں کے نمائندے بھی برابر شریک ہورہے ہیں ۔ جماعت العلماء تمل ناڈو  کی نگرانی اور رہنمائی میں ریاست کے تمام ضلعوں کے بڑے شہروں جسیے چنئی، کوئمبتور، ویلور، ایروڈ، سیلم، ترچی اور وانم باڑی وغیرہ میں بڑے پیمانے پر احتجاج جلسے منعقد کئے جاچکے ہیں۔

ریاست بھر کے گورنمنٹ قاضیوں نے بھی  وزیر اعلٰی ایم کے اسٹالن سے  ایک خصوصی ملاقات   کر کے وقف ترمیمی بل میں ان کی بے باک تائید کا شکریہ اد اکیا۔

اب آتے ہیں دوسرا مسئلہ گورنر کے اختیارات پر ، عدالتِ عالیہ کے حالیہ فیصلے کا جو ریاست تمل ناڈو کے حق میں ہے اور جسے ریاست کے وفاقی حق خودارادیت کی ایک شاندار جیت سے تعبیر کیا جا رہا ہے اس سے پہلے یہ جان لیں کہ کسی بھی مہذب معاشرے کی سب سے بڑی پہچان اس کی جانب سے قانون کی پاسداری اور اس کی پابندی ہوتی ہے، ایسے معاشرے اپنے درمیان پیدا ہونے اختلافات چاہے وہ کتنے ہی بڑے کیوں نہ ہوں قانون کے دائرے میں حل کر کے اپنے آپ کو اس کا پابند بناتے ہیں۔ اس اعتبارسے وطن عزیز ایک منفرد اور کامیاب تاریخ کا حامل ہے۔ آزادی کے بعد سے لے کر آج تک اگر وطن عزیز میں جمہوریت تر و تازہ ہے تو اس کی بنیادی وجہ یہاں قانون کی حکمرانی کا اکثر معاملات میں مجبوراً ہی سہی   رواج رہا ہے۔ موجودہ مرکزی حکومت جب سے بر سرِ اقتدار آئی ہے اس کی پہلی کوشش یہی ہے کہ اس کو پورے ملک کا بلا شرکت غیرے مالک تسلیم کر لیا جائے۔ مگر جہاں اس کو ایسا ہوتا ناممکن لگنے لگتا ہے وہاں وہ اس بات کی جان توڑ کوشش کرتی ہے کہ آئین اور قانون میں موجود رخنوں کو چور دروازوں کی شکل دے کر ان کی مدد سے غیر آئینی ہی سہی  اقتدار کے دائروں پر قابض ہو کر اپنی من مانی کرے۔ خاص کر ان ریاستوں میں جہاں حزبِ اختلاف بڑی حد تک مضبوط ہے اور اقتدار پر قابض ہے اس کی یہ کوشش کئی زاویوں سے لگاتار ہوتی رہتی ہے۔ کبھی مرکزی ایجنسیوں کے ذریعے تو کبھی نئے قوانین کےذریعے  مگر سب سے گہری در اندازی گورنری کے نام سے ہوتی ہے۔ ایسا نہیں کہ یہ کام موجودہ مرکزی سرکار کی کوئی نئی اختراع  ہے، اس سے پہلے کی حکومتیں بھی اسی راہ پر گامزن رہ چکی ہیں مگر موجودہ حکومت چونکہ ایک الگ نظریہ اور بیانیہ رکھتی ہے اس لیے اس کی اولین کوشش یہی ہوتی ہے وہ ہر جگہ ممکن حد تک اپنے فکری بندوں کو پلانٹ کرے اور انہیں کمک پہنچاتی رہے۔

حزبِ اختلاف کی زیرِ اقتدار ریاستیں جیسے تمل ناڈو، کیرلا، کرناٹکا، تلنگانہ، پنجاب اور مغربی بنگال میں مرکزی حکومت کی جانب سے بھیجے گئے گورنروں کے ساتھ  وہاں کی منتخب حکومتوں کی روز بروز کی مخاصمت اس بات کا کھلا ثبوت ہے کہ کیسے مرکزی سرکار ایک آئینی عہدے کے ذریعے ان منتخب حکومتوں کو یرغمال بنانے کی کوشش کرتی رہتی ہے۔ اس پس منظر میں گزشتہ دنوں ریاست تمل ناڈو کی جانب سے گورنر کے خلاف داخل کر دہ عرضی پر ریاست کے حق میں فیصلہ سناتے ہوئے ملک کی عدالتِ عالیہ نے گورنر کو جو پھٹکار لگائی ہے وہ اس یقین کے لئے کافی ہےکہ وطنِ عزیز میں  اس گئے گذرے جمہوری اقداروں کے زوال کے دور میں بھی عدالت اور قانون پوری بے باکی کے ساتھ  سچائی اور حق کے ساتھ کھڑے رہنا اپنا فرض سمجھتے ہیں جو ہماری وفاقی جمہوریت کے لیے بے حد ضروری ہے۔

ریاستِ تمل ناڈو کی حکومت اور گورنر کے درمیان شروع ہوئے اس قضیے کی کہانی چار پانچ سالوں پر محیط ہے۔ جنوری 2020 سے لے کر اپریل 2023 تک ریاستی مقننہ نے 12 بل پاس کر کے  جن میں سے زیدہ تر سرکاری یونیورسٹیوں میں وائس چانسلرز کی تقرریوں سے متعلق تھے گورنر کی رضامندی کے لئے بھیجا تھا۔ عزت مآب  گورنر نے ان بلوں کومنظوری دینے کے بجائے انہیں  اپنے پاس روکے رکھا۔

گورنر کی اس  کاروائی سے آئینی طور پر پریشان ہو کر نومبر 2023 میں حکومت تمل ناڈو نے ایک رٹ پٹیشن  کے ذریعے عدالت عالیہ سے رجوع کیا، جس میں یہ دعویٰ کیا گیا کہ گورنر نے ریاستی مقننہ کے ذریعے منظوری کے لئے بھیجے گئے مختلف بلوں اور دیگر تجاویزات کو غیر معینہ مدت تک کے لئے زیرِ التواء رکھا ہے۔ حکومت تمل ناڈو  نے اس عرضی میں  نشاندہی کی کہ چار اقسام کے "معاملات” ہیں جو گورنر کے پاس زیرِ التواء ہیں اور جن پر کوئی ردعمل ظاہر نہیں کیا گیا ہے۔

پہلی قسم کے معاملات اُن 12 بلوں سے متعلق ہیں جو 2020 سے 2023 کے درمیان تمل ناڈو کی قانون ساز اسمبلی سے منظور کیے گئے۔ آئین کے آرٹیکل 200 کے مطابق جب کوئی بل ریاستی اسمبلی میں منظور ہو جائے تو اسے گورنر کو بھیجا جانا چاہیے۔ اس کے بعد گورنر کے پاس تین اختیارات ہوتے ہیں: بل کو منظوری دینا، منظوری روک لینا، یا صدرِ جمہوریہ کے غور کے لیے محفوظ رکھنا۔

آرٹیکل 200 یہ بھی کہتا ہے کہ گورنر کو بل پیش کیے جانے کے بعد "جلد از جلد” اسے ایک پیغام کے ساتھ واپس بھیجنا ہوتا ہے جس میں بل کے کچھ مخصوص حصوں یا پورے بل پر دوبارہ غور کی درخواست کی جاتی ہے۔ اگر اسمبلی اس بل کو دوبارہ منظور کر لے اور واپس گورنر کو بھیجے تو گورنر کو لازماً اس پر منظوری دینی ہوتی ہے۔

تمل ناڈو حکومت نے کہا کہ 13 جنوری 2020 سے 28 اپریل 2023 کے درمیان گورنر کو جو 12 بل بھیجے گئے وہ ریاستی یونیورسٹیوں سے متعلق قوانین میں ترمیم سے متعلق ہیں۔

ان 12 بلوں میں سے آٹھ بل ایسے ہیں جو ریاستی حکومت کو یہ اختیار دیتے ہیں کہ وہ گورنر کے بجائے خود وائس چانسلر مقرر کرے۔ ایک بل میں وائس چانسلر کی تقرری کے لیے قائم انتخابی کمیٹی میں حکومت کے نامزد فرد کی شمولیت کی تجویز ہے۔ دو بل حکومت کو چانسلر کی جگہ معائنہ اور تفتیش کا اختیار دیتے ہیں۔ تین بل ایسے ہیں جو تمام یونیورسٹیوں (سوائے تین سرکاری یونیورسٹیوں کے) کی سینڈیکیٹ میں مالیاتی سیکریٹری کی شمولیت کی بات کرتے ہیں۔ ایک بل حکومت کی طرف سے ایک آیورویدک یونیورسٹی کے قیام سے متعلق ہے۔ ایک بل تو یہ بھی چاہتا ہے کہ ریاستی حکومت تمام ریاستی یونیورسٹیوں (ما سوائے یونیورسٹی آف مدراس) میں وائس چانسلر کی تقرری کا مکمل اختیار حاصل کرے۔

دوسرے قسم کے معاملات وہ ہیں جن میں 10 اپریل 2022 سے 15 مئی 2023 کے درمیان ریاستی حکومت نے کچھ فائلیں گورنر کو بھیجیں تاکہ بدعنوانی کے انسداد کے قانون 1988 کے تحت مختلف اخلاقی بدعنوانیوں کے مرتکب سرکاری اہلکاروں کے خلاف قانونی کارروائی کی منظوری لی جا سکے۔

اس کے علاوہ حکومت نے یہ بھی کہا کہ 24 اگست 2023 سے 28 جون2024 کے درمیان قیدیوں کی قبل از وقت رہائی کے متعلق بھیجی گئی 54 فائلیں بھی گورنر کے پاس زیر التواء ہیں۔

آخر میں، تمل ناڈو پبلک سروس کمیشن کے ارکان کی تقرری سے متعلق مختلف تجاویز بھی زیر التواء ہیں۔ آئین کا آرٹیکل 316 کہتا ہے کہ ریاستی پبلک سروس کمیشن کے چیئرمین اور دیگر ارکان کی تقرری گورنر کے ذریعہ ہونی چاہیے۔

عدالت عالیہ نے ان بلوں اور تجاویز کےالتواء کو تشویش کا باعث قرار دتے ہوئے وزارتِ داخلہ کے توسط سے مرکزی حکومت کو نوٹس جاری کیے۔ اس دوران عزت مآب گورنر صاحب نے  دو بل صدر کے پاس بھیج دئے اور باقی دس پر رضامندی روک لی یعنی انہیں واپس اسمبلی کو بھیج دیا ۔ تامل ناڈو حکومت نے اس پس منظر میں تامل ناڈو اسمبلی کے ایک خصوصی اجلاس میں تمام دس بلوں کو پھر پاس کر کے انہیں دوبارہ گورنر کے پاس منظوری کے لئے بھیج دیا۔ وزیرِ اعلیٰ ایم کے اسٹالن نے ان بلوں پر دوبارہ غور کے لیے قرارداد پیش کرتے وقت اس نکتے پر زور دیا کہ آئین کے آرٹیکل 200 کے تحت اگر کوئی بل دوبارہ منظور ہو کر گورنر کو بھیجا جائے تو گورنر "منظوری روک نہیں سکتے”۔

ریاست تمل ناڈو بمقابلہ تمل ناڈو گورنر ، نامی اس ایک سال سے زائد تلخ آئینی تصادم  پر بالآخر 08 اپریل 2025 کو عدالت عالیہ نے ریاستِ تمل ناڈو کے حق میں اپنا فیصلہ سنایا۔ جسٹس جے بی پاردی والا اور جسٹس آر مہادیون کی بنچ  نے متفقہ فیصلہ سناتے ہوئے کہا کہ تمل ناڈو کے گورنر آر این روی کی بلوں کو منظوری دینے میں تاخیر غلط، من مانی اور غیر قانونی ہے اور ساتھ ہی بینچ نے ایک غیر معمولی قدم اٹھاتے ہوئے آئین کے شق 142 کے تحت تمام بلز کو خود ہی منظوری دے دی۔ آئین ہند کا آرٹیکل 142 سپریم کورٹ کو یہ اختیار دیتا ہے کہ وہ ایسے احکامات، فرمان یا ہدایات جاری کرے جو کسی مقدمے میں مکمل انصاف کی فراہمی کے لیے ضروری ہوں، یہ شق عدالت اسی وقت استعمال کرتی ہے جب اسے یقین ہوجاتا ہے کہ انصاف تک پہنچنے  کے لئے روایتی طریقے ناکافی ہیں یا جب کسی تنازعے کا حل موجودہ قوانین سےباہر ہو یا جب فوری اور مؤثر انصاف ضروری ہو۔

یاد رہے تمل ناڈو حکومت نے 2023 میں اس مسئلے کو لے کر سپریم کورٹ سے رجوع کیا تھا اور مؤقف اختیار کیا تھا کہ گورنر نے متعدد بلوں کو تین سال سے زائد مدت تک منظوری کے بغیر روکے رکھا ہے۔ عدالت نے اس کیس پر فروری 2025 میں فیصلہ محفوظ کر لیا تھا۔

گورنر اور مرکزی حکومت کی نمائندگی اٹارنی جنرل آر وینکٹارامانی اور ایڈیشنل سالیسٹر جنرل وکرم جیت بنرجی نے کی، جبکہ تمل ناڈو کی نمائندگی معروف سینئر وکلا راکیش دویدی، ڈاکٹر اے ایم سنگھوی، مکول روہتگی اور پی ولسن نے کی۔

جسٹس جے بی پاردی والا نے فیصلہ سناتے ہوئے بطورِ ابتدائی کلمات  کہا کہ "جب آئین سازوں نے آئین تیار کیا تو ان کے پیشِ نظر یہ تصور تھا کہ گورنر ایک آئینی سربراہ، سمجھدار مشیر اور وزارت کے لیے رہنما ہو گا۔ ایک ایسی شخصیت جو سیاسی کشیدگی کے حالات میں صلح و تدبر کا مظاہرہ کرے گی۔ لیکن اس مقدمے میں جو کچھ ہمارے سامنے آیا ہے، وہ اس تصور کے بالکل برعکس ہے۔ عدالت کو خود ان بگڑے ہوئے حالات کو سنبھالنے کے لیے قدم اٹھانا پڑا ہے جو کہ ایک طویل اور پیچیدہ آئینی جنگ کے باعث پیدا ہوئے۔”

جسٹس جے بی پاردی والا نے مزید کہا کہ آئین کے آرٹیکل 200 کے تحت گورنر کا کردار تین واضح اختیارات تک محدود ہے۔ بل  کو منظوری دینا، بل کو منظوری سے روک لینا، بل کو صدر جمہوریہ کے غور کے لئے محفوظ رکھنا۔ انہوں نے مزید وضاحت کی کہ آرٹیکل 200 کی پہلی توضیح جس کے تحت گورنر کسی بل کو دوبارہ غور کے لیے اسمبلی کو واپس بھیج سکتا ہے، یہ دراصل منظوری روکنے کے اختیار کا ہی ایک جزو ہے۔ اس کا مطلب یہ ہے کہ جب گورنر کوئی بل واپس بھیجتا ہے تو اسے منظوری نہ دینے کے عمل کا حصہ سمجھا جاتا ہے۔ مگر جیسے ہی اسمبلی اس بل کو دوبارہ منظور کر لے، چاہے اس میں ترمیم کی جائے یا نہ کی جائے گورنر آئینی طور پر اس بات کا پابند ہو جاتا ہے کہ وہ اس پر منظوری دے۔ اس مرحلے پر گورنر کے پاس یہ اختیار نہیں رہتا کہ وہ بل کو صدر کے پاس بھیج دے۔

(تمل ناڈو حکومت نے عدالت میں مؤقف اختیار کیا تھا کہ گورنر آر این روی نے ایسا ہی کیا، یعنی کچھ بلوں کو اس وقت صدر کے لیے محفوظ رکھ دیا جب وہ ریاستی اسمبلی سے دوبارہ منظور ہو چکے تھے۔)

عدالت نے واضح طور پر کہا تھا کہ گورنر ریاستی اسمبلیوں کی قانون سازی کے معمول کو روک نہیں سکتا اور زور دے کر یہ بات بھی مسترد کر دی کہ ایک غیر منتخب گورنر، منتخب شدہ اسمبلی کے قانون سازی کے عمل کو  ویٹو کرنے کی طاقت رکھتا ہے۔ فیصلے میں بنچ نے یہ بات بھی دہرائی کہ آئین میں مطلق ویٹو یا پاکٹ ویٹو جیسے تصورات کی کوئی گنجایش نہیں ہے۔

جسٹس جے بی پاردی والا نے آرٹیکل 200 میں درج الفاظ، جتنی جلد ممکن ہو، کی اہمیت پر زور دیتے ہوئے کہا کہ یہ الفاظ اس آئینی شق میں فوری اقدام کا تقاضا کرتے ہیں۔ یہ  گورنر کو اس بات کی اجازت نہیں دیتے کہ وہ کسی بل پر فیصلہ غیر معینہ مدت تک مؤخر کر دے یا قانون سازی کے عمل پر عملاً ویٹو کا اختیار استعمال کرے۔ بلکہ اس شق کے تحت گورنر پر لازم ہے کہ وہ جلد از جلد فیصلہ کرے، اسی تناظر میں بینچ نے گورنر کے اختیارات کے استعمال کے لیے آئندہ واضح ٹائم لائن تجویز کیے تاکہ اختیارات کا بے جا استعمال روکا جا سکے اور آئینی فرائض کو نیک نیتی سے ادا کیا جا سکے۔ جسٹس پاردی والا نے واضح کیا کہ ان اوقات کا تعین کرنا آئین کی "ترمیم” نہیں ہے، بلکہ یہ ایک انتظامی ضرورت کے تحت اٹھایا گیا قدم ہے تاکہ آئینی عمل میں تاخیر سے بچا جا سکے۔

عدالت کی طرف سے تجویز کردہ ٹائم لائن:

٭ اگر گورنر وزراء کی کونسل کے مشورے پر بل کی منظوری سے انکار کریں یا اسے صدر کے لیے محفوظ رکھیں تو یہ عمل ایک ماہ کے اندر مکمل ہونا چاہیے۔

٭اگر گورنر وزراء کی کونسل کے مشورے کے برخلاف منظوری سے انکار کرتے ہیں تو بل کو تین ماہ کے اندر قانون ساز اسمبلی کو واپس بھیجا جانا چاہیے۔

٭اگر گورنر وزراء کے مشورے کے برخلاف بل کو صدر کے لیے محفوظ رکھتے ہیں تب بھی یہ عمل تین ماہ کے اندر مکمل کیا جانا چاہیے۔

٭اگر اسمبلی بل کو دوبارہ منظور کر کے گورنر کو بھیجتی ہے تو گورنر پر لازم ہے کہ وہ ایک ماہ کے اندر اس پر منظوری دے دیں۔

جسٹس جے بی پاردی والا نے فیصلے کے اختتامی کلمات میں کہا کہ ہم کسی طور گورنر کے منصب کو کم تر نہیں سمجھ رہے بلکہ ہم اس بات پر زور دے رہے ہیں کہ گورنر کو پارلیمانی جمہوریت کی طے شدہ روایات کے مطابق عمل کرنا چاہیے۔ انہوں نے کہا کہ گورنر کوئی سیاسی کردار ادا کرنے والا فرد نہیں ہوتا بلکہ وہ دراصل "دوست، فلسفی اور رہنما” کے طور پر ریاستی حکومت کے ساتھ کام کرنے کا پابند ہے۔ جسٹس پاردی والا نے فیصلے کے اختتام پر ڈاکٹر امبیڈکر کے تاریخی الفاظ نقل کیے : "چاہے آئین کتنا ہی اچھا کیوں نہ ہو، اگر اس پر عمل کرنے والے اچھے نہ ہوں تو وہ آئین بھی بُرا ثابت ہوگا اور چاہے آئین کتنا ہی بُرا ہو اگر اس پر عمل کرنے والے اچھے ہوں تو وہ آئین بھی اچھا ثابت ہو سکتا ہے۔”

عدالت عالیہ کے اس تاریخی فیصلے پر ریاست تمل ناڈو کے وزیر اعلیٰ ایم کے اسٹالین نے ریاستی اسمبلی میں  کہا کہ یہ صرف تمل ناڈوکی ہی نہیں بلکہ تمام ریاستوں کے لیے ایک بڑی جیت ہے۔  ڈی ایم کے ریاستی خودمختاری اور وفاقی اصول کے لیے اپنی جدوجہد جاری رکھے گی اور اس جدوجہد میں ضرور کامیابی حاصل کرے گی۔ اس کے علاوہ انہوں ایکس پر ٹویٹ کرتے ہوئے لکھا کہ ہم آج معزز سپریم کورٹ کے تاریخی فیصلے کا تہِ دل سے خیرمقدم کرتے ہیں، جس نے ریاستی اسمبلیوں کے قانون سازی کے حقوق کی توثیق کی ہے اور ان رجحانات کا خاتمہ کیا ہے جن کے بل پر مرکز کی جانب سے نامزد  گورنر حزبِ اختلاف  کی حکومت والی ریاستوں میں ترقی پسند قانون سازی کو روکنے کی کوشش کرتے رہے ہیں۔ یہ فیصلہ مرکز اور ریاستوں کے درمیان توازن کی بحالی کی جانب ایک اور اہم قدم ہے اور تمل ناڈو کی اُس مسلسل جدوجہد میں جیت کی ایک سنگِ میل ہے جس کا مقصد ایک وفاقی بھارت کو ممکن بنانا ہے۔

سینئر ایڈووکیٹ پی ولسن، جنہوں نے تمل ناڈو حکومت کی نمائندگی کی، نے اس فیصلے کو ڈی ایم کے حکومت کے لیے ایک بڑی کامیابی قرار دیا۔ انہوں نے کہا کہ کسی بل کو غلط طور پر صدرِ جمہوریہ کے لیے محفوظ رکھنا، اس کے بعد صدر کی جانب سے کیا گیا کوئی بھی اقدام کالعدم ہوگا اور گورنر کو کوئی مطلق اختیار حاصل نہیں ہے، آرٹیکل 200 کو آرٹیکل 163 کے ساتھ پڑھا جانا چاہیے جو گورنر کو کابینہ کے مشورے پر عمل کرنے کا پابند بناتا ہے۔

سینئر صحافی این رام نے اس فیصلے کے تناظر میں کہا کہ گورنر یہ سمجھتے ہیں کہ وہ بااختیار ہیں اور ایک علیحدہ حکومت چلا سکتے ہیں، اگر اُن میں ذرا بھی خودداری باقی ہے تو انہیں فوری طور پر اپنے عہدے سے استعفیٰ دے دینا چاہیے اور اگر وہ ایسا نہیں کرتے ہیں تو مرکزی حکومت کو چاہیے کہ اُنہیں برطرف کرے۔

کیرالہ کے وزیر اعلیٰ پنارائی وجین نے سپریم کورٹ کے اس فیصلے کا خیرمقدم کرتے ہوئے کہا کہ یہ فیصلہ وفاقی ڈھانچے اور ریاستی اسمبلیوں کے جمہوری حقوق کو مضبوط کرتا ہے۔ وجین، جن کی حکومت کا سابق کیرالہ گورنر عارف محمد خان کے ساتھ اہم بلز روکنے پر ٹکراؤ ہو چکا ہے، نے مزید کہا کہ سپریم کورٹ نے ایک بار پھر واضح کر دیا ہے کہ گورنرز کو کابینہ کے مشورے کے مطابق ہی عمل کرنا ہوگا۔

کرناٹکا کے وزیر اعلیٰ سدا رمیا نے ایکس پر اس فیصلے پر تبصراتی ٹویٹ کرتے ہوئے لکھا ہے کہ سپریم کورٹ کا فیصلہ، جس میں تمل ناڈو کے گورنر آر این روی کی یکطرفہ کارروائیوں کو کالعدم قرار دیا گیا ہے جو کہ آئین کی روح کی کھلی خلاف ورزیاں تھیں، نہ صرف ایک آئینی فتح ہے بلکہ پورے ملک کے گورنرز کے لیے سخت انتباہ بھی ہے۔ یہ فیصلہ نریندر مودی کی قیادت میں بی جے پی حکومت کے لیے بھی ایک واضح پیغام ہے، جو مسلسل پس پردہ رہ کر اداروں کو سیاسی مقاصد کے لیے استعمال کر رہی ہے۔ یہ عدالتی مداخلت صرف ایک ریاستی تنازعہ کا حل نہیں بلکہ وفاقی ڈھانچے، جمہوری اقدار، اور آئینی اصولوں کے تحفظ کی ایک مثالی نظیر بن چکی ہے۔

دیکھا جائے تو سپریم کورٹ کا ریاست تمل ناڈو بمقابلہ تمل ناڈو گورنر پر حالیہ فیصلہ ملک بھر میں گورنروں کے کردار کی تشریح میں ایک سنگِ میل ثابت ہو سکتا ہے۔ ریاست کیرلا، کرناٹکا، تلنگانہ، پنجاب اور ویسٹ بنگال میں  حکومت اور گورنر کے درمیان تصادم کے ایسے ہی معاملات مسلسل آتے رہے ہیں اور اسی تناظر میں کچھ ریاستوں کے مقدمات عدالت عالیہ میں چل بھی رہے ہیں۔ امید غالب ہے ان مقدمات پر اس فیصلے کا مثبت اثر ہوگا۔

عدالت عالیہ کے حالیہ فیصلے سے ایک بار پھر مرکزی حکومت کی  جانب سے اپنے سیاسی فائدے کے لئے گورنر جیسے آئینی عہدہ کا استحصال  اور اس کے ذریعے منتخب ریاستی اسمبلیوں کے فیصلوں میں رکاوٹ  ڈالنے کی روش پر بحث ابھر کر منظرعام پر آگئی ہے۔ مگر ماضی میں سخت تنقید کے باوجود مرکزی حکومت کا طرز عمل ایسے گورنروں کی جو مسلسل اپنے آئینی حدود سے تجاوز کرتے رہتے ہیں، پیٹھ تھپتھپانے کا اور انہیں انعامات سے نوازنے کا رہا ہے۔

یہ اور بات ہے کہ موجودہ مودی حکومت جب اقتدار میں آئی تو اس کا نعرہ تعاون پر مبنی وقافیت کا تھا مگر وقت کے ساتھ ساتھ اس کا جھکاؤ مرکزی اقتدار کے نظریے کے جانب مُڑتا چلا گیا۔ گلوبلائزیشن کے موجودہ دور میں کسی بھی ملک میں سیاسی استحکام ہی اس کی ہمہ جہتی ترقی کا پہلا ضامن ہے۔ اس تناظر میں مرکز اور ریاستوں کے درمیان بڑھتی ہوئی دوریاں اور اعتماد کا فقدان وطن عزیز میں مضبوط سیاسی استحکام کے لئے خطرہ بن سکتے ہیں۔ ایسے میں عدالتیں ہی واحد امید ہیں جن سے یہ توقع کی جاسکتی ہے کہ وہ ملک میں قائم وفاقی ڈھانچے اور اس میں دوڑتی جمہوریت کی روح  کا ہر حال میں تحفظ کریں گی۔ عدالت عالیہ کا ریاستِ تمل ناڈو بمقابلہ تمل ناڈو گورنر مقدمے پر حالیہ فیصلہ اس سوچ کو تقویت بخشتا ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سہ لسانی پالیسی کا تنازعہ اورپارلیمانی حلقوں کی نئی حد بندی

اسانغنی مشتاق رفیقی، وانم باڑی

ٹمل ناڈو کی ریاستی اور دہلی کی مرکزی حکومتوں کے درمیان ایک عرصے سے جو سرد جنگ کی سی کیفیت تھی آج کل اس میں بڑی تیزی آگئی ہے۔ چھوٹے چھوٹے مسائل اور رنجشوں سے شروع ہوئی یہ مخاصمت اب ایک تناور پیڑ کی شکل اختیار کرتی جارہی ہے۔ ایک طرف جہاں  عزت مآب گورنر کے روز مرہ کے عوامی معاملات میں آئینی رنگ سے زیادہ سیاسی رنگ جھلکتا ہے وہیں مرکزی حکومت کی جانب سے ریاستی حکومت  کو گھیرنے اور اس کے پر کترنے کے اقدامات کے لئے بہانے ڈھونڈنے کی حکمت عملی زوروں پر دکھائی دے رہی ہے،  وہیں ریاستی حکومت  خم ٹھوک کر میدان میں دونوں سے بر سرِ پیکار نظر آرہی ہے۔ مہینوں میں دو ایک بار کی جھڑپ سے بات آگے بڑھ کر اب روزانہ دونوں جانب سے اونچے عہدوں پر براجمان رہنماؤں کے درمیان لفظی جنگ تک آگئی ہے۔ مسئلے سمٹ کر دو مدعوں پر آگئے ہیں جس پر دونوں جانب سے گھماسان چھڑ چکا ہے۔

پہلا مسئلہ جو ریاستِ ٹمل ناڈو کے لئے ناک کا مسئلہ بھی ہے اور اس کے سیاسی رہنماؤں کے بقول اس کے وجود کا بھی وہ زبان کا مسئلہ ہے۔ دو لسانی پالیسی پر کاربند ریاستِ ٹمل ناڈو کی حکومت  مرکزی حکومت کی جانب سے پیش کردہ قومی تعلیمی پالیسی کے تحت سہ لسانی پالیسی کو اپنی آزادی میں راست مداخلت کے طور پر دیکھتی ہے اور اسے اپنے اوپر ہندی تھوپنے سے تعبیر کرتی ہے۔ اسی طرح دوسرا مسئلہ جو ملک بھر میں بحث کا موضوع بن چکا ہے وہ پارلیمانی حلقوں کی حد بندی کا مسئلہ ہے۔ اس پر ریاستِ ٹمل ناڈو کے وزیرِ اعلیٰ کا موقف جہاں جنوبی ہندوستان کی ریاستوں میں ایک بیداری کی لہر پیدا کر چکا ہے وہیں مرکزی حکومت کو دفاعی محاذ میں دھکیل دیا ہے۔

جہاں تک زبان کے مسئلے کا تعلق ہے ریاستِ تمل ناڈو میں یہ اس کے قدیم ترین مسائل میں سے ایک ہے۔ اس مسئلے کی ابتدا بیسویں صدی کے اوائل میں ہوئی جب موجودہ ریاستِ تمل ناڈو سابقہ مدراس اسٹیٹ اور مدراس پریذیڈنسی کا ایک حصہ تھی۔ اس مسئلے کو لے کر سب سے پہلی تحریک 1937 میں شروع ہوئی جب برطانوی راج کے تحت قائم ہونیوالی پہلی انڈین نیشنل کانگریس حکومت جس کی قیادت سی راجگوپال آچاری کر رہے تھے، انہوں نے مدراس پریذیڈنسی کے اسکولوں میں ہندی کی تعلیم کو لازمی حیثیت دی تو ای وی راماسوامی پریار، سوما سندرا بھارتیار اور اس وقت کی حزب اختلاف جسٹس پارٹی نے اس کی شدید مخالفت کی اور حکومت کے خلاف احتجاج شروع کیا۔ یہ احتجاج مسلسل تین سال چلتا رہا جس میں حکومت کے اس اقدام کے خلاف بھوک ہڑتال، کانفرنسیں، دھرنے، جلوس اور جلسے منعقد  ہوتے رہے۔ حکومت نے سختی سے اس احتجاج کو کچلنے کی کوشش کی جس کے نتیجے میں دومظاہرین کی موت واقع ہوئی اور 1198 افراد گرفتار ہوئے جن میں خواتین اور بچے بھی شامل تھے۔ 1939 میں کانگریسی حکومت نے دوسری جنگِ عظیم میں ہندوستان کی شمولیت کے مدعے پر استغفیٰ دے دیا۔ ای وی راماسوامی پریار نے جو اس تحریک کے روح رواں تھے گورنر سے ہندی کی تعلیم کو لازمی کرنے والا قانون واپس لینے کی درخواست کرتے ہوئے احتجاج کو معطل کردیا، 1940 میں گورنر ایرسکائن نے اس قانون کو واپس لیتے ہوئے ہندی کی تعلیم کو لازمی کی جگہ اختیاری کردیا۔

درحقیقت اس وقت اس مسئلے کا تناظر کچھ یوں تھا کہ برطانوی دورِ حکومت کے ہندوستان میں سرکاری زبان انگریزی تھی مگر پورا ملک کئی علاقائی زبانوں میں بٹا ہوا تھا، جیسے جیسے ہندوستان میں آزدای کی لہر میں تیزی آنے لگی اس بات کی کوشش بھی شروع ہوئی کہ ہندی کو ملک بھر کے لئے ایک عوامی رابطے کی زبان بنا یا جائے۔ اس مقصد کے لئے 1918  میں گاندھی جی نے دکشن بھارت ہندی پرچار سبھا قائم کیا اور انڈین نیشنل کانگریس نے جہاں جہاں اس کی سرکاریں قائم ہوئیں وہاں وہاں سرکاری  زبان کو انگریزی سے ہندی میں تبدیل کردیا۔ مگر ریاستِ تمل ناڈو کے سماجی مصلح راما سوامی پریار نے اس کو قابلِ قبول نہیں سمجھا۔ انہوں اس بات کو تملوں پر شمالی ہندوستانیوں کی اجارہ داری کے طور لی۔ پریار کی سماجی اصلاح کے لئے شروع کی گئی عزتِ نفس کی تحریک اور ریاستی سرکار میں حزبِ اختلاف کا کردار ادا کرنے والی جسٹس پارٹی کے علاوہ ریاست بھر کے تمل اسکالرز نے کانگریس کے اس فیصلے کو برہمنوں کی جانب سے تمل زبان پر ہندی اور سنسکرت مسلط کرنے کی کوشش کے طور پر دیکھا اور چونکہ ریاست میں پریار کی سماجی عزت نفس کی تحریک کی وجہ سے برہمن مخالف جذبات پہلے ہی سے بھڑکے ہوئے تھے ایسے میں ہندی زبان کے سیکھنے کو لازمی قرار دئے جانے کا ریاستی سرکار کا فیصلہ جلتی میں تیل کا کام کرگیا اور یہ تحریک سیاسی تحریک سے آگے بڑھ کر ایک عوامی تحریک بن گئی اور اس وقت کے گورنر کو اس احتجاج کے سامنے جھکنا پڑا اور ہندی لازمی کے قانون کو واپس لینا پڑا۔

سن 1947 ء میں ہندوستان کی آزادی کے بعد مرکز کی کانگریس حکومت نے تمام ریاستوں پر زور دیا کہ وہ اسکولوں میں ہندی کی تعلیم کو لازمی بنائیں۔ مدراس پریذیڈنسی کی کانگریس حکومت نے 49-1948 تعلیمی سال میں اعلیٰ کلاسوں میں ترقی کے لئے طلباء کو ہندی میں کم از کم اہلیت لازمی قرار دیا۔ پریار نے اس زبردستی کے خلاف پھر سے تحریک چھڑ دی۔ اس احتجاج میں پریار کے ساتھ انا دورائی بھی شامل رہے اور گرفتاریاں دیں۔ آخر کار حکومت نے 1950 میں اپنے پہلے فیصلے کو واپس لیتے ہوئے ہندی پڑھنے کو اختیاری بنا دیا۔

آزادی کے بعد ہندوستان کی آئین کی تشکیل کے دوران بھی زبان کے مسئلے پر کافی بحث و تکرار ہوئی اور انگریزی کے ساتھ ہندی کو بھی طے شدہ مدت کے لئے سرکاری زبان کے طور پر شامل رکھنا طے پایا مگر عوامی محاذ پر اس کی مخالفت جاری رہی، خاص کر ریاست تمل ناڈو میں ای وی راما سوامی پریار کی سماجی اصلاحی تحریک ڈراوڑا کژگم کی کوکھ سیجنم لینے والی سیاسی جماعت ڈروڑا منیٹرا کژگم نے ریاست میں ہندی مخالفت کا جھنڈا بلند کئے رکھا۔ 1953 میں ڈی ایم کے نے کللاکدی احتجاج شروع کیا، یہ احتجاج کللا کدی جو ضلع ترچناپلی کا ایک چھوٹا سا گاؤں ہے، اس کی ڈالمیا پورم نام کی تبدیلی کو لے کر تھا، اس احتجاج کے دوران ڈالمیا پورم ریلوے اسٹیشن پر ہندی میں لکھے گئے نام کو ایم کرونا ندھی اور ان کے ساتھیوں نے مٹانے کی کوشش کی اور گرفتاریاں دیں۔  28 جنوری 1956 کو پریار اور انادورائی نے راجاجی کے ساتھ مل کر انگریزی زبان کو سرکاری زبان کے طور پر جاری رکھنے کی توثیق کرتے ہوئے اکیڈمی آف تمل کلچر کی طرف سے منظور کردہ ایک قرار داد پر دستخط کئے۔ ڈی ایم کے نے  13 اکتوبر 1957 کو ہندی مخالف دن کے طور پر منایا اور 31 جولائی کو چنئی میں ایک اور ہندی مخالف کانفرنس منعقد کیا، 1963 میں سرکاری زبانوں کے ایکٹ کے منظوری پر اپنا موقف پہلے سے سخت کرتے ہوئے بطور سرکاری زبان ہندی کی اہلیت پر ہندی کی عددی برتری کے جواب میں انا دورائی کا جواب ” اگر ہمیں اپنے قومی پرندے کا انتخاب کرتے وقت عددی برتری کے اصول کو قبول کرنا ہوتا تو انتخاب مور پر نہیں بلکہ عام کوے پر پڑتا”، ڈی ایم کے کی ہندی مخالفت کی شدت کا ایک برملا اظہار تھا۔

جنوبی ہندوستان کے کئی ریاستوں سے مخالفت کے باوجود ہندی کو واحد سرکاری زبان بنانے کی مرکزی حکومت کی کوششیں جاری ہیں۔ یادرہے ہندوستان میں ریاستیں اکثر علاقائی زبانوں کی بنیاد پر بنائی گئی ہیں۔ سرکاری زبانوں کا قانون 21 جنوری 1963 کو پارلیمنٹ میں پیش کیا گیا، جس کی ڈی ایم کے کی جانب سے شدید مخالفت ہوئی۔ لیکن 27 اپریل کو یہ بل بغیر کسی تبدیلی کے منظور کر لیا گیا۔ ڈی ایم کے رہنما انادورائی نے جیسا کہ انتباہ کیا تھا اس پر عمل کرتے ہوئے ریاست گیر احتجاج شروع کیا۔ نومبر 1963 میں انادورائی اور ان کے پانچ سو ساتھیو کو ہندی مخالف کانفرنس میں آئین کے حصہ 17 کو جلانے کے الزام میں گرفتار کیا گیا اور انہیں چھ ماہ قید کی سزا سنائی گئی۔ 25 جنوری 1964 کو ڈی ایم کے کے ایک رکن چنا سوامی نے ہندی نفاذ کے خلاف احتجاج کرتے ہوئے خود سوزی کرلی۔ 7 مارچ 1964 کو مدراس ریاست کے وزیرِ اعلیٰ ایم بھکتا واچلم نے مدراس قانون ساز اسمبلی کے اجلاس میں ریاست میں سہ لسانی پالیسی متعارف کرانے کی سفارش کی، اس با ت کو لے کر تشویش شروع ہوئی اور طلبہ کے درمیان ہندی مخالفت میں بے حد اضافہ ہوا۔ ڈی ایم کے رہنماؤں نے 1965 کے آتے آتے اس تحریک کو طلباء کی تحریک میں تبدیل کر دیا اور کالج کے طلباء کو ساتھ لے کر ایک شدید احتجاج شروع کردیا۔ 25 جنوری 1965 کے دن  مدورائی میں مشتعل طلباء اور ریاستی سرکاری پارٹی کے کارکنوں کے درمیان  تصادم بے قابو ہو کر فساد کی شکل اختیار کرگیااورمختصر مدت میں ریاست کے دوسرے حصوں میں بھی پھیل گیا۔ پولیس نے طلبہ کے جلوسوں کو لاٹھی چارج اور فائرنگ سے جواب دیا۔ آتش زنی، لوٹ مار اور سرکاری املاک کو نقصان پہنچانے کے واقعات عام ہو گئے۔ ریلوے سٹیشنوں پر ہندی نام کے بورڈ جلا دیے گئے۔ ٹیلی فون کے کھمبے توڑ دیے گئے اور ریل کی پٹریاں اکھاڑ دی گئیں۔ حکومت نے صورتحال کو امن و امان کا مسئلہ سمجھا اور احتجاج کو روکنے کے لیے نیم فوجی دستوں کو بلا لیا۔ پولیس کی کارروائی سے مشتعل ہجوم نے دو پولیس اہلکاروں کو ہلاک کر دیا۔ کئی مشتعل افراد نے خود سوزی کرلی یا زہر کھا کر خودکشی کر لی۔ دو ہفتوں کے فسادات میں تقریباً 70 لوگ مارے گئے (سرکاری اندازوں کے مطابق)۔ بڑی تعداد میں طلباء کو گرفتار کیا گیا تھا۔ املاک کو پہنچنے والے نقصان کا تخمینہ دس ملین روپے لگایا گیا تھا۔ اس دوران زبان کے مسئلے پر حکومت کے اندر رائے منقسم ہوگئی، ایک گروپ تملوں پر ہندی مسلط کرنے کے خلاف تھا تو ایک دوسرا گروپ ہر حال میں ہندی کا نفاذ چاہتا تھا۔ شدید احتجاج کے دوران وزیرِ اعظم شاستری نے آل انڈیا ریڈیو کے ذریعے قوم سے خطاب کرتے ہوئے نہرو کی یقین دہانیوں کا احترام کرنے کا وعدہ کیا، انہوں نے تملوں کو یہ بھی یقین دلایا کہ مرکزی حکومت ریاست کیساتھ مواصلات میں انگریزی کا استعمال جاری رکھے گی۔ شاستری جی کی یقین دہانی کے بعد طلبہ کونسل نے احتجاج غیر معینہ مدت تک کے لئے ملتوی کردیا۔ ریاست میں ہندی مخالفت کی یہ تحریک آہستہ آہستہ کانگریس مخالف تحریک میں تبدیل ہوگئی اور 1967 کے ریاستی انتخابات میں کانگریس پارٹی ایک ایسی کراری شکست سے دوچار ہوئی جس کے بعد سے آج تک وہ تمل ناڈو میں کبھی اپنے بل پر حکومت بنانے کی پوزیشن میں نہیں آئی۔

انادورائی کے حکومت سنبھالنے کے کچھ عرصے بعد ریاست میں پھر سے ہندی مخالف احتجاج شروع ہوگیا جس کو قابو میں کرنے کے لئے 23 جنوری 1968 کے دن  قانون ساز اسمبلی میں ایک قرار داد منظور کی جس کے تحت ریاست میں سہ لسانی پالیسی کو ختم کر کے ہندی کو نصاب سے نکال دیا گیا۔ اسکولوں میں صرف انگریزی اور تمل کو لازمی مضامین کے طور پر پڑھائے جانے کے علاوہ این سی سی کے طلبا کو ہدایات ہندی میں دئے جانے کے رواج کو بھی ختم کردیا گیا۔ ساتھ ہی مرکزی حکومت پر زور دیا گیا کہ وہ آئین میں ہندی کو دی گئی خصوصی حیثیت کو ختم کرے اور تمام زبانوں کے ساتھ یکساں سلوک کرے، اور اس پر بھی زور دیا گیا کہ وہ آئین کے آٹھویں شیڈول میں مذکورہ تمام زبانوں کی ترقی کے لیے مالی مدد فراہم کرے۔ ان اقدامات نے مشتعل افراد کو مطمئن کیا اور فروری 1968 تک حالات  معمول پر لوٹ آئے۔

جب 1986 میں ہندوستان کے وزیرِ اعظم راجیو گاندھی نے قومی تعلیمی پالیسی متعارف کرائی اور تمام ریاستوں میں جواہر نوودیا ودیالیہ پروگرام شروع کرنے کا اعلان کیا تو تمل ناڈو کے سیاسی رہنماؤں نے اسے پھر سے ہندی مسلط کئے جانے کے طور پر دیکھا اور اس وقت کے حزب اختلاف کے رہنما ایم کروناندھی نے سخت احتجاج کا راستہ اپنایا۔اس وقت ریاست میں ڈی ایم کے سے سیاسی اختلافات کے بنا پر علیحدہ ہوئی اے ڈی ایم کے کی حکومت تھی جس کی قیادت ایم جی رامچندرن کر رہے تھے۔ 13 نومبر 1986 کو، تامل ناڈو کی قانون ساز اسمبلی نے متفقہ طور پر ایک قرارداد منظور کیا جس میں آئین کے حصہ 17 کو منسوخ کرنے اور انگریزی کو یونین کی واحد سرکاری زبان بنانے کا مطالبہ کیا گیا۔ ڈی ایم کے ارکان نے آئین کے 17 حصہ کو جلا کر نئی تعلیمی پالیسی کے خلاف احتجاج کیا، کروناندھی سمیت ڈی ایم کے کے لگ بھگ بیس ہزار ارکان کو گرفتار کیا گیا۔ کئی افراد نے احتجاج میں خود سوزی کر لی۔ راجیو گاندھی نے تمل ناڈو کے ممبران پارلیمنٹ کو یقین دلایا کہ ریاست میں ہندی کو نافذ نہیں کیا جائے گا۔ سمجھوتے کے ایک حصے کے طور پر، تمل ناڈو میں نوودھیا اسکول شروع نہیں کیے گئے۔ فی الحال، تمل ناڈو ہندوستان کی واحد ریاست ہے جس میں نوودیا اسکول نہیں ہیں۔

اسی طرح 2014 میں وزارتِ داخلہ کے اس حکم پر کہ سوشیل نیٹ ورکنگ سائٹس پر ہندی اورانگریزی کے استعمال میں ہندی کو ترجیح دیں، اس اقدام کی تمل ناڈو کی تمام سیاسی جماعتوں نے فوری طور پر مخالفت کی، اس وقت کی تمل ناڈو کی وزیر اعلیٰ جے للیتا نے خبردار کیا کہ یہ ہدایت تمل ناڈو کے لوگوں کے لیے پریشانی کا باعث بن سکتی ہے جنہیں اپنی لسانی وراثت پر بہت فخر ہے اور یہ ان کے جذبات سے منسلک ہے۔ ان مظاہروں نے انگریزی کے مسلسل سرکاری استعمال کو یقینی بنایا۔

حال میں نئی تعلیمی پالیسی 2020 کو تمل ناڈو کے وزیرِ اعلی ایم کے اسٹالین نے یہ کہتے ہوئے مسترد کردیا ہے کہ یہ پالیسی چونکہ سہ لسانی فارمولے کی تائید کرتی ہے جو کہ تمل ناڈو کے دو زبانوں کی پالیسی کے خلاف ہے۔ اس بات پر مرکزی حکومت نے تمل ناڈو کو سماگرا شکشا فنڈز کے تحت الاٹ کئے گئے 2152 کروڑ روپیے روک لئے۔ نئی تعلیمی پالیسی 2020 پانچ سال قبل وزیرِ اعظم نریندر مودی کی حکومت نے متعارف کرائی تھی اور وہ اسے مرحلہ وار نافذ کرتی آرہی ہے۔ یہ پالیسی واضح طور پر سہ لسانی فارمولے کی تائید کرتی ہے  جس میں طلباء کو تین زبانیں سیکھنے کے لئے کہا گیا ہے اور مزید اس میں یہ بھی کہا گیا ہے کم از کم  دو زبانیں ہندوستان کی مقامی ہونی چاہئیں۔ اسٹالین اس نئی پالیسی پر عمل نہ کرنے کی جہاں کئی وجوہات گناتے ہیں وہیں ان کا یہ بھی الزام ہے کہ یہ سہ لسانی پالیسی ریاست میں ہندی مسلط کرنے کا باعث بنے گی۔

مرکزی حکومت کی جانب سے ہندی کے فروغ کے لئے غیر ہندی بولنے والی ریاستوں میں ہندی اساتذہ کی تقرری کے لیے 2019 میں 50 کروڑ روپے مختص کرنے سے ان خدشات کو مزید تقویت دی، اس کے علاوہ ناقدین شمالی اسکولوں یا کیندریہ ودیالیوں میں جنوبی ہندوستانی زبانوں کو فروغ دینے کے لیے اسی طرح کی کوششوں کی کمی کی نشاندہی کرتے ہیں۔

ریاستِ تمل ناڈو میں زبان کا مسئلہ ایک حساس مسئلہ ہے،  وزیرِ اعلیٰ ایم کے اسٹالین نے ایک ٹوئٹ میں لکھا ہے کہ وہ ریاست پر ہندی مسلط کرنے کی مرکزی سرکار کی کوششوں کو کبھی کامیاب ہونے نہیں دیں گیاور تمل ناڈو کو بلیک میل کر کے ہتھیار ڈالنے پر مجبور نہیں کیا جاسکتا۔ انہوں نے لکھا کہ کیا یہ ستم ظریفی نہیں ہے کہ نئی تعلیمی پالیسی جو اہداف 2030 میں حاصل کرنا چاہتی ہے وہ تمل ناڈو کبھی کا حاصل کر چکی ہے، گویا یہ ایسا ہے جیسے پی ہچ ڈی اسکالر کو کوئی ایل کے جی کا طالبِ علم لیکچر دے رہا ہو، دراوڑین دہلی سے ڈکٹیشن نہیں لیتے بلکہ وہ خود قوم کے لئے راستہ طے کرتے ہیں۔ انہوں نے بی جے پی کی سہ لسانی پالیسی کی تائید میں دستخطی مہم کا تمسخر اڑاتے ہوئے لکھا ہے کہ میں انہیں چیلنج کرتا ہوں کہ وہ 2026 کے اسمبلی انتخابات میں اسے اپنا بنیادی ایجنڈا بنائیں اور اسے ریاست میں ہندی کے نفاذ پر ریفرینڈم کے طور پر ہونے دیں۔ انہوں نے لکھا ہے کہ تمل ناڈو میں ہندی مسلط کرنے کی کوئی بھی کوشش کبھی کامیاب نہیں ہوگی۔ تمل ناڈو برطانوی استعمار کی جگہ ہندی استعمار کو برداشت نہیں کرے گی۔ مرکزی حکومت کے اسکیموں کے ناموں سے لے کر اداروں کے ایوارڈ دینے تک ہندی کو بری طرح مسلط کر دیا گیا ہیجس سے غیر ہندی بولنے والوں کا دم گھٹ رہا ہے جو ہندوستان میں اکثریت میں ہیں۔ حکومتیں آتی اور جاتی رہیں گی مگر ہندوستان میں ہندی کے تسلط کے ٹوٹنے کے بعد بھی، تاریخ یاد رکھے گی کہ یہ ڈی ایم کے ہی تھی جو اس لڑائی میں سب سے آگے تھی۔

اس مسئلے پر پورے ملک میں ماحول گرم ہونے لگا ہے، سیاسی لیڈران اپنے اپنے مفاد کو ذہن میں رکھ کر اس پر بیان بازی کر رہے ہیں یہ سمجھے بغیر کہ یہ حساس مسئلہ کہاں تک جاسکتا ہے۔ دانشور حضرات جہاں سہ لسانی پالیسی کو تعلیمی اعتبار سے بہتر مانتے ہیں وہیں اس بات کے قائل ہیں کہ ریاست تمل ناڈو کی دو زبانوں کی پالیسی بہت کامیاب رہی ہے اور اس سے تعلیمی معیار بلند ہوا ہے۔ کئی دانشوروں نے سجھاؤ دیا ہے کہ مرکز اور تمل ناڈو کے درمیان اس مسئلہ پر تعمیری بات چیت ہونی چاہئے اور اس کے نتیجے میں ایک عملی سمجھوتہ ضروری ہے۔ مرکز کی جانب سے فنڈز روکے جانے کو ایک بری مثال قرار دیتے ہوئے بہت ساروں نے اس پر سخت تنقید بھی کی ہے اور مسئلے کے حل کے لئے اس حرکت کو ناموزوں قرار دیا ہے۔

ریاستِ تمل ناڈو میں زبان کے مسئلے پر ماضی میں جس طرح کی تحریکیں اٹھی ہیں اور جس شدت کے احتجاجات ہوئے ہیں ان کو مدِ نظر رکھتے ہوئے یہی بہتر ہے کہ اس مسئلے پر دونوں حکومتیں سیاست کرنے کے بجائے اگر مل بیٹھ کر اس مسئلے کا کوئی مستقل حل ڈھونڈ نکالیں تو یہ ملک  اور ملک کے مستقبل کے لئے بہت بہتر ہوگا۔

اسی ضمن میں ایک دوسرا مسئلہ پارلیمانی حد بندی کا بھی ہے،یاد رہے کہ آزاد ہندوستان میں سب سے پہلے حد بندی 1952 میں حد بندی کمیشن ایکٹ 1952 کے تحت ہوئی۔ حد بندی کا مطلب ہر ریاست میں لوک سبھا اور قانون ساز اسمبلیوں کے لئے نشستوں کی تعداد اور نشستوں کی حدود طے کرنے کا عمل ہے۔ اس کے علاوہ درج فہرست ذاتوں (ایس سی) اور درج فہرست قبائلوں (ایس ٹی) کے لئے مخصوص نشستوں کا تعین بھی اسی کے ذیل میں آتا ہے۔ حد بندی آبادی کی بنیاد پر طے پاتی ہے تاکہ ہر فرد کے ووٹ کی طاقت چاہے اس کا تعلق کسی بھی ریاست سے ہو سب کے برابر رہے۔

پہلی حد بندی کے بعد دوسری حد بندی 1963 میں، حد بندی کمیشن ایکٹ 1962 کے تحت اور 1973 میں حد بندی کمیشن ایکٹ 1972 کے تحت طے پائی۔ حد بندی کا یہ عمل صدر جمہوریہ کی جانب سے نامزد ایک سہ رکنی کمیشن کی ذمہ داری میں ہوتا ہے، اس کمیشن میں عدالت عالیہ کے سبکدوش جج، سابق الیکشن کمشنر اور سابق ریاستی الیکشن کمشنرنامزد کئے جاتے ہیں۔ کمیشن کی اولین ذمہ داری یہی ہوتی ہے کہ وہ تمام حلقوں کی آبادی کو تقریباً مساوی انداز میں تقسیم کرکے حلقوں کی تعداد اور حدود کا تعین کرے اور جہاں جہاں درج فہرست ذاتوں اور درج فہرست قبائلوں کی تعداد زیادہ ہو وہاں ان کے لئے مخصوص نشستوں کی نشاندہی کرے۔ اگر کمیشن کے اراکین میں اختلاف رائے پیدا ہوجائے تو اکثریت کی بنیاد پر فیصلہ ہوگا۔ ہندوستان میں حد بندی کمیشن ایک اعلیٰ طاقتور ادارہ ہے، جس کے احکامات میں قانون کی طاقت ہوتی ہے،اسے کسی بھی عدالت کے سامنے کھڑا نہیں کیا جاسکتا ہے اور نہ اس کے کسی فیصلے کو چلینج کیا جاسکتا ہے۔

چونکہ حد بندی کے تعین میں آبادی کا کردار ہی اصل ہوتا ہے اس لئے ہر مردم شماری کے بعد اس میں بدلاؤ کو ناگزیر سمجھا جاتا ہے۔ 1972 تک اس اصول کی بنا پر حد بندی کا معاملہ سلجھتا رہا لیکن اس کے بعد جب یہ دیکھا گیا کہ کچھ ریاستوں نے آبادی پر قابو پانے کی سنجیدہ کوششیں نہیں کیں اور اس کی وجہ سے آبادی کا تناسب ریاستوں کے درمیان بگڑنے لگا ہے اور ایسے میں حد بندی نئے مردم شماری کے تحت مسئلہ بن سکتی ہے تو آئین میں ترمیم کر کے، 42 ویں ترمیمی ایکٹ 1976 کے ذریعے لوک سبھا میں ریاستوں کے لئے نشستوں کی تقسیم کو 1971 کی سطح سال 2000 تک لئے منجمد کر دیا گیا۔

تاہم 84 ویں ترمیمی ایکٹ کے تحت 1991 کی مردم شماری کو بنیاد بنا کر ریاستوں کی سطح پر علاقائی حد بندیوں کی اصلاح کی اجازت دی گئی اور اسی طرح 87 ترمیمی ایکٹ کے تحت 2001 کی مردم شماری کی بنیاد پر ریاستوں کے سطح پر علاقائی حد بندیوں کی اجازت دی گئی اس شرط کے ساتھ کہ یہ عمل ریاستوں کو الاٹ کئے گئے لوک سبھا کی نشستوں کی تعداد میں کمی بیشی اور رد وبدل کئے بغیر ہوگا۔

ابھی تک 1971 کی مردم شماری کی بنیاد پر کی گئی حد بندی ہی وطن عزیز میں رائج ہے۔ موجودہ حکومت نے جب سے پارلیمنٹ کی نئی عمارت بنائی تبھی سے یہ بات طے سمجھی جانے لگی کہ بہت جلد سرکار نئی حد بندی کے ذریعے لوک سبھا میں اراکین کی تعداد میں اضافے کا ارادہ رکھتی ہے جو یقینی طور پر نئے مردم شماری کے تحت ہوگا۔ چونکہ 2021 کی مردم شماری کا عمل کووڈ 19 وبائی بیماری کی وجہ سے ملتوی کر دیا گیا تھا تو پھر اسے 2026 سے پہلے مکمل کرکے اس کے تحت لوک سبھا اور ریاستی قانون ساز اسمبلیوں کی نئی حد بندی کی جانی ہے۔

اگر نئے مردم شماری کی بنیاد پر حد بندی کا عمل شروع ہوگا تو اس کا راست اثر جنوبی ہندوستان کی ریاستوں پر پڑے گا اور چونکہ ان ریاستوں نے آبادی پر قابو پانے لئے مرکزی حکومت کی جانب سے دئے گئے احکامات کو نافذ کیا جس کے نتیجے میں ان کی آبادی کی شرح میں بہت کمی آئی ہے بنسبت شمالی ہندوستان کے، جہاں کی اکثر ریاستوں نے آبادی پر قابو پانے میں کوئی قابلِ ذکر سنجیدگی نہیں دکھائی اس وجہ سے وہاں آبادی کی شرح میں زیادہ اضافہ ہوا ہے، اس بنیاد پر جنوبی ہندوستان کی ریاستیں  نئی حد بندی میں خسارے میں رہیں گی۔ جہاں اس کے اراکین کی تعداد بڑی حد تک گھٹ کر قابل توجہ نہیں رہے گی وہیں شمالی ہندوستان کی اکثر ریاستیں فائدے میں رہیں گی اور مرکزی حکومتوں میں ان کی سیاسی طاقت میں زبردست اضافہ ہوگا۔ یہ اس کے باوجود ہوگا کہ جنوبی ہندوستان کی ریاستیں آبادی کے لحاظ سے ملک کا 18 فیصد ہیں لیکن جی ڈی پی میں ان کا حصہ 35 فیصد ہے۔

نئے مردم شماری کے تحت اگر لوک سبھا میں فی الوقت موجودہ تعداد 543 نشستوں کی بنیاد پرحد بندی کی جاتی ہے تو جنوبی ہندوستان کی ریاستوں میں ٹمل ناڈو کو آٹھ نشستوں کا خسارہ ہوگا اس طرح کرناٹکا کو دو، آندھرا پردیش اور تلنگانہ کو آٹھ، کیرلا کو آٹھ کا خسارہ ہوگا وہیں شمالی ہندوستان کی ریاستوں میں یو پی کو گیارہ، بہار کو دس، راجستھان کو چھ، مدھیہ پردیش کو چار کا فائدہ ہوگا۔ اگر لوک سبھا کی نشستوں میں اضافہ کر کے 848 کر دی جائے تو اس سے جنوبی ہندوستان کی ریاستوں کو کوئی خسارہ تو نہیں مگر شمالی ہندوستان کی بنسبت ان کی نمائندگی پارلیمنٹ میں کم ہو جائے گی۔ یعنی اس حساب سے ریاست ٹمل ناڈو کو دس، آندھرا اور تلنگانہ کو بارہ، کیرلا کو صفر، کرناٹکا کو تیرا کا فائدہ ہوگا وہیں شمالی ہندوستان کی ریاستوں میں یو پی کو 63، بہار کو 39، راجستھان کو 25، مدھیہ پردیش کو 23 نشستوں کا فائدہ ہوگا۔

ریاستِ ٹمل ناڈو کی نمائندگی کی شرح موجودہ پارلیمنٹ میں 7 فیصد ہے اگر نئے مردم شماری کے تحت حد بندی کی گئی تو اس کی نمائندگی گھٹ کر 5 فیصدی پر آجائے گی۔ جنوبی ہندوستان کی ریاستوں میں ریاستِ ٹمل ناڈو کی موجودہ حکومت سیاسی طور پر بڑی حد تک مضبوط ہے اور لگتا ہے اس نے اس مسئلے پر مرکزی حکومت سے دو دو ہاتھ کرنے کی ٹھان لی ہے۔

ریاست کے وزیر اعلیٰ ایم کے اسٹالین نے گھر میں اپنے آپ کو مضبوط کرنے کے لئے گزشتہ دنوں ریاستی سیاسی جماعتوں کی ایک کل جماعتی میٹنگ طلب کی جس میں حلیف جماعتوں کے ساتھ حزبِ اختلاف کے رہنماؤں نے بھی شرکت کی سوائے بھاجپا اور اس کی ایک حلیف جماعت کے، اور اس میٹنگ میں متفقہ طور پر جو پانچ رکنی قرار داد منظور کی گئی وہ کچھ یوں ہے:

٭مرکزی حکومت کو ٹمل ناڈو کی موجودہ پارلیمانی نمائندگی کو کسی بھی شکل میں، قطعی طور پر یا فیصد کے لحاظ سے کم کرنے کے لیے کسی بھی قدم کو ترک کرنا چاہیے۔ آبادی میں اضافے کو کامیابی سے کنٹرول کرکے قومی مفاد میں کام کرنے کی کوئی سزا ہم قبول نہیں کریں گے۔

٭عزت مآب وزیرِ اعظم کو پارلیمنٹ میں واضح یقین دہانی کرانی ہوگی کہ 1971 کی آبادی کی بنیاد پر نشستوں کی حد بندی کو مزید 30 سال کے لیے بڑھایا جائے گا، اور اس کو یقینی بنانے کے لیے آئینی ترمیم کو پاس کرنا ہوگا۔

٭اگر پارلیمانی نشستیں بڑھائی جاتی ہیں تو تمل ناڈو کی نمائندگی موجودہ ڈھانچے کے متناسب بڑھنی چاہیے۔ ہماری صحیح سیاسی آواز سے کوئی ہیرا پھیری یا کمزوری قابل قبول نہیں ہوگی۔ تمل ناڈو کی سیٹوں کا موجودہ فیصد جو کل کا 7.18 ہے وہ کسی بھی حالت میں کم نہیں ہونا چاہیے۔

٭تمل ناڈو حد بندی کے خلاف نہیں ہے، لیکن وہ اسے ترقی پسند ریاستوں کے خلاف ایک مخفی ہتھیار بننے کی اجازت نہیں دے سکتا اور نہ ہی دے گا۔

٭تمام سیاسی جماعتوں (جنوبی ہندوستانی ریاستوں کے اراکین پارلیمنٹ کے ساتھ) سے ایک جوائنٹ ایکشن کمیٹی بنانے کے لیے رابطہ کیا جائے گا، تاکہ اس غیرمنصفانہ مقصد کو فوری اور ہرسطح پر ایک جدوجہد کے طور پر اٹھایا جائے اور اس کے لئے تمام ضروری حمایت و تعاون حاصل کیا جائے۔

اس کے علاوہ وزیرِ اعلیٰ اسٹالین نے ایکس پر ایک ٹوئٹ کے ذریعے یہ خبر دی ہے کہ انہوں اس گمبھیر مسئلے کو لے کر کیرلا، آندھرا پردیش، تلنگانہ، کرناٹکا جیسی جنوبی ریاستوں کے علاوہ بنگال، اڈیسہ اور پنجاب کے وزرائے اعلٰی سے  اور وہاں کی سیاسی پارٹیوں کے رہنماوں سے بھی رابطہ کر کے انہیں اپنے اس قانونی حق کی لڑائی میں ساتھ دینے کی درخواست کی ہے۔ انہوں نے یہ بھی لکھا ہے کہ وہ اس مقصد کے لئے ایک جوائنٹ ایکشن کمیٹی بنا رہے ہیں جس کا پہلا جلسہ 22 مارچ 2025 کو چنئی میں طے ہیاس کے لئے  لگ بھگ تمام بڑی سیاسی پارٹیوں کے قائدوں کو انہوں نے درخواست بھیجی ہے کہ وہ اس  میٹنگ میں اپنے معتبر رہنماؤں کو ضرور بھیجیں اور ریاستی حقوق کی حفاظت کی اس لڑائی میں ان کا بھر پور ساتھ دیں۔

تلنگانہ کے وزیرِ اعلیٰ ریونتھ ریڈی نے اسٹالین کے سُر میں سُر ملاتے ہوئے تیکھے الفاظ میں مرکزی حکومت کے خلاف الزام لگاتے ہوئے کہا ہے کہ ” بی جے پی تیسری بار مرکز میں اقتدار میں واپس آئی ہے، لیکن ابھی بھی اس کو  جنوبی ہندوستان پر خاصی گرفت حاصل نہیں ہوسکی ہے۔ مثال کے طور پر، 2024 کے لوک سبھا انتخابات میں جیتی گئی 240 نشستوں میں سے صرف 29 نشستیں جنوبی ہندوستان سے آئیں۔ اسی لیے بی جے پی حد بندی کے ذریعے جنوبی ہندوستان سے بدلہ لینے کی کوشش کر رہی ہے۔”

اس مسئلے پر ریاستِ ٹمل ناڈو کے نقش قدم پر چلتے ہوئے تلنگانہ کی کانگریسی حکومت نے بھی ریاستی سطح پر ایک آل پارٹی میٹنگ بلانے کا فیصلہ کیا ہے۔ اس کے علاوہ وزیرِ اعلیٰ ریونت ریڈی نے مرکز سے مطالبہ کیا ہے کہ حد بندی کا عمل 1971 کی مردم شماری کی بنیاد پر کیا جائے اور اس اہم معاملے پر تبادلہ خیال کے لیے تمام جماعتوں کی میٹنگ بلائی جائے، کیونکہ یہ مسئلہ بھارتی جمہوریت پر گہرا اثر ڈالے گا۔

ریاستِ کرناٹکا کے وزیرِ اعلیٰ سدا رمیا نے ایک بیان جاری کرتے ہوئے اسٹالین کے موقف کی تائید کی ہے، انہوں نے کہا ہے اگر آبادی کے تازہ ترین تناسب کی بنیاد پر حد بندی کی جاتی ہے تو یہ جنوبی ریاستوں کے ساتھ سخت ناانصافی ہوگی۔ اس طرح کی ناانصافی کو روکنے کے لیے، آئینی ترامیم کے بعد، 1971 کی مردم شماری کو بنیاد  بنا کر حد بندی کی جانی چاہئے۔

آندھرا پردیش کے وزیر اعلیٰ چندرا بابو نائیڈو نے جو مرکزی حکومت  کے صف اول کے حلیفوں میں سے ہیں، تمل ناڈو کے وزیرِ اعلیٰ ایم کے اسٹالن کی جانب سے اٹھائے گئے خدشات کا جواب دیتے ہوئے،گول مول بات کی ہے اور راست جواب نہ دیتے ہوئے  کہا ہے کہ ان تمام امور پر بات چیت کی جائے گی۔ بعض اوقات کچھ فیصلے مفروضوں کی بنیاد پر کیے جاتے ہیں، لیکن ہر مفروضہ معاشرے کے لیے فائدہ مند ثابت نہیں ہوتا، ہمیں اپنے نظریات بدلنے ہوں گے۔

اس کے علاوہ انڈیا الائنس سے تعلق رکھنے والے اکثر سیاسی پارٹیوں نے جن کا تعلق جنوبی ہندوستان سے ہے کھل کر وزیرِ اعلیٰ اسٹالین کے موقف کو صحیح ٹہرایا ہے۔ لیکن کانگریس کے اعلیٰ سطح کیرہنماؤں نے ابھی تک اس پر کھل کر اپنی بات نہیں رکھی ہے۔ اسی طرح مغربی بنگال کی وزیرِ اعلیٰ ممتا بنرجی اور پنجاب کے وزیر اعلیٰ بھگونت مان نے بھی اس مسئلے پر ابھی تک کوئی راست تبصرہ نہیں کیا ہے۔ حالانکہ ان کی ریاستیں بھی اس عمل سے متاثر ہورہی ہیں۔

اس موضوع پر ملک کے کئی دانشوروں نے بھی اپنی بات رکھنے کی کوشش کی ہے، کچھ کا خیال ہے کہ 1971 کی مردم شماری کو نامعلوم وقت تک کے لئے آئین میں ترمیم کر کے حد بندی کی بنیاد قرار دے دی جائے، وہیں کچھ  کا خیال ہے کہ نفع اور نقصان سے اوپر اٹھ کر ملک کے مفاد میں فرد کے ووٹ کی طاقت کو تسلیم کرتے ہوئے  نئی مردم شماری کے تحت حد بندی ہونی چاہئے۔ وہیں کچھ دانشوروں کا خیال ہے کہ اقتصادی اور سماجی ترقی کی بنیاد پر کچھ ایسا طریقہ کار وضع کرنا چاہئے کہ جس سے ان ریاستوں کو جنہوں نے آبادی پر قابو پانے کی کامیاب اقدامات کئے ہیں خسارہ نہ ہو اور یہی وفاقیت کے ساتھ انصاف ہوگا۔

ابھی تک یہ مسئلہ صرف مرکزی حکومت اور جنوبی ریاستوں کی حکومتوں کے درمیان بحث کا موضوع ہے،کئی بڑی پارٹیوں کے سیاسی رہنماؤں نے بھی اس پر کھل اپنا موقف ظاہر نہیں کیا ہے۔ اگر کسی وجہ سے یہ مسئلہ عوام کے درمیان چلا گیا جس کے آثار نظر آ بھی رہے ہیں تو یہ بڑی پریشان کن بات ہوگی اور اس کے اثرات کیا ہوں گے، اس کی پیشن گوئی کرنا بے حد مشکل ہے۔

مرکزی حکومت کی جانب سے وزیرِ داخلہ امت شاہ جی کے بار بار اس یقین دہانی کے باوجود کہ نئی حد بندی سے جنوبی ریاستوں کی نشستوں میں کوئی کمی نہیں ہوگی  روز بروز اس مسئلہ پر ماحول گرم ہوتا جارہا ہے۔ پی چد مبرم جو نہ صرف کانگریس کے ایک بڑے سینئر رہنما  ہیں بلکہ کئی بار سابقہ مرکزی حکومتوں میں اہم وزارت پر فائز رہ چکے ہیں، جن کا تعلق ریاست ٹمل ناڈو سے ہے، انہوں نے حد بندی کے موجودہ مسئلہ پر تبصرہ کرتے ہوئے لکھا ہے کہ اگر مرکزی حکومت آئین کے آرٹیکلز 81 اور 82 پر سختی سے عمل کرتی ہے اور جنوبی ریاستیں آبادی کی بنیاد پر نئی حد بندی کی مخالفت پر قائم رہتی ہیں، تو یہ ایک ایسی صورتحال ہوگی جہاں ایک قابل مزاحمتی قوت ایک اٹل شے سے ٹکرا رہی ہوگی۔ اس کے نتیجے میں اختلافات اور بحران جنم لیں گے۔ کیا ہمارے پاس اتنی بصیرت ہے کہ ہم اس مسئلے کا خوشگوار حل تلاش کر سکیں؟

دونوں مسئلے چاہے وہ سہ لسانی فارمولے کے تحت نئی تعلیمی پالیسی کا ہو یا پارلیمنٹ میں حد بندی کا مسئلہ تمل ناڈو کی اکثریت اس کو اپنے اوپر شمالی تسلط کی کوشش کے طور پر دیکھتی ہے اور ان مسائل پر یہاں کی اکثر سیاسی پارٹیوں میں بھی مضبوط فکری اتحاد پایا جاتا ہے۔ سوائے بی جے پی اور اس کے دو ایک اتحادی پارٹیوں کے کوئی بھی ان مسائل میں الگ سے ایک نیا بیانیہ تراشنے کی کوشش نہیں کررہا ہے۔ کیونکہ وہ جانتے ہیں کہ کوئی بھی ایسی کوشش سیاسی خود کشی ہوگی اور پھر وہ کبھی عوام کی نظر میں اعتبار حاصل نہیں کرسکیں گے۔ اسی طرح مرکزی سیاسی پارٹیاں اس مسئلے پر ریاست کے ساتھ کھڑے ہونے میں ہچکچاتی ہیں یا صاف اختلافی نقطہء نظر پیش کرتی ہیں کیونکہ انہیں شمال کے اپنے ووٹ بینک کی فکر ہوتی ہے۔ ایسے میں ان مسائل کا کوئی حل نکالنا جوئے شیر لانے کے برابر ہے۔ اب دیکھنا یہ ہے کہ پہلے ہی سے مذہب اور ذات پات میں بٹی آج کل کی سیاسی لیڈر شپ کیا اب لسانی اور علاقائیت کے نام پر تقسیم کو اور ہوا دے گی یا ووٹ بینک کی سیاست سے اوپر اٹھ کر ملک اور ملک کے مستقبل کی خاطر ان مسائل کا ایسا حل نکالنے کی کوشش کرے گی جو سب کو تسلیم ہو۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔