فروری 2025

اسانغنی مشتاق رفیقی، وانم باڑی

٭ وقف ترمیمی بل کو راجیہ سبھا میں پیش کئے جانے کو بدقسمت فعل قرار دیتے ہوئے آل انڈیا مسلم پرسنل لاء بورڈ کے صدر مولانا خالد سیف اللہ رحمانی نے کہا کہ یہ بل صرف مسلمانوں کا مسئلہ نہیں بلکہ آئین کی خلاف ورزی کا مسئلہ ہے اور مسلم پرسنل لاء بورڈ وقف ترمیمی بل کے خلاف قانون کے دائرے میں رہتے ہوئے ملک گیر مہم چلائے گا،ایک پریس کانفرنس سے خطاب کرتے ہوئے انہوں نے کہا کہ وقف کے بارے میں بہت سی باتیں سامنے آئی ہیں جن میں کچھ اچھی ہیں لیکن جھوٹی باتیں زیادہ پھیلائی گئی ہیں جیسا کہ جس زمیں پر وقف بورڈ ہاتھ رکھ دیتا ہے وہ اسی کی ہوجاتی ہے جب کہ ایسا بالکل نہیں ہے۔۔۔ یو این آئی اردو

مولانا محترم! جو کچھ بھی کرنا ہے سوچ سمجھ کر ٹھوس لائحہ عمل بنا کر کرنا ہوگا، ورنہ یہ بھی اس سے پہلے چلائے گئے مہمات  کی طرح وقت اور وسائل کا ذیاں ہی ثابت ہوگا۔

 

٭لوک سبھا میں اپوزیشن رہنما راہل گاندھی نے کہا ہے کہ منی پور میں بگڑتے ہوئے حالات کے لیے وزیر اعظم نریندر مودی ذمہ دار ہیں اور وہ اس ذمہ داری سے بچ نہیں سکتے اسی لیے تاخیر سے ہی سہی، لیکن انہوں نے منی پور میں صدر راج نافذ کرنے کا فیصلہ کیا ہے مسٹر گاندھی نے ایک بیان میں کہا کہ منی پور میں صدر راج کا نفاذ اس بات کا اعتراف ہے کہ مسٹر مودی نے آخر کار تسلیم کر لیا کہ 20 ماہ میں منی پور میں جو حالات بگڑے ہیں، ان کے لیے وہ خود ذمہ دار ہیں ۔۔۔ یو این آئی اردو

اسے کہتے ہیں آپداؤں میں اوسر تلاش کرنا! صاحب کو ان ہی کی چھڑی سے ہانکنے کی کامیاب کوشش!! لگے رہو راہل بابا!!

 

٭ اردن کے شاہ عبداللہ کے ساتھ ملاقات کے دوران صدر ٹرمپ نے غزہ کے باشندوں کو ہمسایہ ممالک (مصر اور اردن) میں بسانے کا منصوبہ دہرایا ہے، امریکہ کے صدر ڈونلڈ ٹرمپ نے غزہ کے فلسطینوں کو قبول کرنے سے انکار کرنے کی صورت میں مصر کے ساتھ اردن کی مالی امداد روکنے کا اعلان کیا ہے، شاہ عبداللہ کا کہنا ہے کہ ٹرمپ کا ’غزہ منصوبہ‘ اردن اور اسرائیلی تعلقات میں کشیدگی کا سبب بن سکتا ہے ۔۔۔ بی بی سی اردو

جس تیزی سے ٹرمپ اوٹ پٹانگ، دھونس و دھمکی  سے پُر سیاسی فیصلے لے رہے ہیں اس سے ایک نیا محاورہ، اکیسویں صدی میں سیاسی غنڈہ گردی کا دوسرا نام ڈونالڈ ٹرمپ!! بن سکتا ہے! کیا سمجھے!!

 

٭ وزیراعظم نریندر مودی اور امریکی صدر ڈونلڈ ٹرمپ کے درمیان ٹیرف اور تجارت کے حوالے سے کافی تعمیری بات چیت ہوئی اور دونوں رہنما باہمی طور پر فائدے مند تجارتی معاہدے پر کام کرنے کیلئے  متفق ہوئے امریکی صدر نے وائٹ ہاؤس میں وزیراعظم مودی کا بہت گرمجوشی سے استقبال کیا ۔۔۔ یو این آئی اردو

ولی را وَلی می شَناسَد

 

٭ بجٹ اجلاس کے پہلے مرحلے کی تکمیل کے بعد لوک سبھا کی کارروائی 10 مارچ تک کے لئے ملتوی کر دی گئی، اسپیکر اوم برلا نے ایوان کو ملتوی کرنے سے پہلے کہا کہ بجٹ اجلاس کے پہلے مرحلے کے دوران اچھے ماحول میں بحث ہوئی ایوان کی کارکردگی 112 فیصد رہی  انہوں نے کہا کہ ایوان میں صدر جمہوریہ کے خطبے پر 17 گھنٹے 23 منٹ تک بامعنی بحث ہوئی اور 173 اراکین نے اس میں حصہ لیا مسٹر برلا نے کہا کہ اسی طرح بجٹ پر 16 گھنٹے 13 منٹ تک بحث ہوئی اور اس دوران 170 اراکین نے بحث میں سرگرمی سے حصہ لیا۔۔۔ یو این آئی اردو

یعنی نشستن، گفتن، برخاستن کی ایک اور شاندار مشق! خوب!!

 

٭ یوکرین جنگ کے خاتمے کے لیے ٹرمپ اور پوٹن مذاکرات پر رضامند، امریکی صدر ڈونلڈ ٹرمپ نے کہا کہ انہوں نے ولادیمیر پوٹن سے فون پر طویل بات کی اور روسی صدر نے یوکرین میں جنگ کے خاتمے کے لیے مذاکرات شروع کرنے پر اتفاق کا اظہار  کیا۔ بات چیت کے لیے وہ سعودی عرب میں روسی صدر سے ملاقات کریں گے۔ کریملن نے کہا کہ صدر پوٹن اور امریکی صدر ٹرمپ کے درمیان بات چیت تقریباً ڈیڑھ گھنٹے تک جاری رہی۔ دونوں رہنماؤں نے اس بات پر اتفاق کیا کہ "ایک ساتھ کام کرنے کا وقت آ گیا ہے” اور پوٹن نے ٹرمپ کو ماسکو آنے کی دعوت دی ہے۔۔۔ ڈی ڈبلیو اردو

یعنی بہت جلد انکل سام اور سائبیریا کا ریچھ سعودی عرب کے صحرا میں خیمہ لگا کر کنگ سلمان کے دف پر  دھھمال ڈالنے والے ہیں!

 زمین چمن گل کھلاتی ہے کیا کیا

بدلتا ہے رنگ آسماں کیسے کیسے

٭حکومت نے وقف ترمیمی بل پر قائم مشترکہ پارلیمانی کمیٹی (جے پی سی) کی رپورٹ کو اپوزیشن کے ذريعے  غیر قانونی اور غیر آئینی قرار دینے کو افسوسناک قرار دیتے ہوئے کہا ہے کہ اگر انہیں لگتا ہے کہ رپورٹ میں ان کا کوئی نقطہء نظر نہیں ہے تو وہ کمیٹی کے چیئرمین سے اپیل کر سکتی ہے ۔۔۔ یو این آئی اردو

غیر قانونی اور غیر آئینی بل کو اگر غیر قانونی اور غیر آئینی نہ کہیں تو اور کیا کہیں! جہاں تک  جے پی سی کے چیرمین سے اپیل کی بات ہے

تھا ارادہ تری فریاد کریں حاکم سے

وہ بھی اے شوخ ترا چاہنے والا نکلا

 

٭سب سے پہلے، ہندوستان ایک جمہوری ملک ہے اور ہماری ثقافت ‘واسودھائیو کٹمبکم’ ہے،ہم دنیا کے ساتھ ایک خاندان کی طرح برتاؤ کرتے ہیں، اور میں ہر ہندوستانی کو ایک جیسا سمجھتا ہوں، دوسری بات یہ ہے کہ ایسے ذاتی معاملات کے لئے دو ممالک کے رہنما نہ ملتے ہیں نہ بیٹھتے ہیں اور نہ ہی بات کرتے ہیں ۔۔۔ امریکہ میں صدر ڈونالڈ ٹرمپ کے ساتھ ایک پرس کانفرنس میں صنعتکار گوتم اڈانی سے متعلق ایک سوال کے جواب میں وزیر اعظم نریندر مودی

بالآخر اونٹ پہاڑ کے نیچے آہی گیا! صاحب کی دکھتی رگ کو چھیڑنے والوں نے چھیڑ ہی دیا! پر صاحب کا جواب ؟! بقول شاعر

جواب آیا مری قسمت سے لیکن لاجواب آیا

 

٭ اقوام متحدہ کے محکمہ برائے انسانی حقوق کی تازہ رپورٹ ميں بنگلہ ديش کی سابق حکومت پر سنگين الزامات عائد کئے گئے ہيں۔ پچھلے سال حکومت مخالف مظاہروں ميں قريب 1,400 افراد ہلاک ہو گئے تھے۔ اقوام متحدہ کے کمشنر برائے انسانی حقوق کے دفتر سے جاری کردہ بيان ميں کہا گيا ہے کہ حکومت مخالف مظاہرين اور ان کے حاميوں پر پرتشدد حملے کی باقاعدہ پاليسی کے شواہد ملے ہيں۔ جنيوا سے جاری کردہ رپورٹ ميں يہ خدشہ ظاہر کيا گيا ہے کہ ايسے اقدامات انسانيت کے خلاف جرائم کے زمرے ميں آسکتے ہيں اور ان کی اس ضمن ميں تفتيش لازمی ہے ۔۔۔ ڈی ڈبلیو اردو

قریب ہے یار روز محشر چھپے گا کشتوں کا قتل کیوں کر

جو چپ رہے گی زبان خنجر لہو پکارے گا آستیں کا

 

٭کانگریس اور عام آدمی پارٹی (اے اے پی) کے درمیان اتحاد کی "مضبوط ضرورت” کی وکالت کرتے ہوئے، نوبل انعام یافتہ پروفیسر امرتیہ سین نے کہا کہ دونوں پارٹیوں کو دہلی کے انتخابات باہمی طور پر طے شدہ وعدوں کے ساتھ مل کر لڑنا چاہئے تھا۔ سین نے یہ بھی کہا کہ اگر ہندوستان میں سیکولرازم کو زندہ رکھنا ہے تو نہ صرف متحد ہونا ہوگا بلکہ ان چیزوں پر بھی معاہدہ کرنا ہوگا جنہوں نے ہندوستان کو تکثیریت کی ایک بہترین مثال بنایا ہے ۔۔۔ پی ٹی آئی

موذن مرحبا بر وقت بولا

تری آواز مکے اور مدینے

 

٭آنے والوں کی اعداد و شمار ساٹھ کروڑ ہوں گے، لیکن اتنے بڑے اعداد و شمار کے بعد بھی حکومت یہاں جانیں گنوانے والوں اور بھگڈر میں مرنے والوں کی فہرست مہیا کرنے میں ناکام کیوں ہے؟ ۔۔۔ مہا کمبھ بھگدڑ کے لیے اتر پردیش کی ڈبل انجن سرکار کو کٹہرے میں کھڑا کرتے اور مرنے والوں کی تعداد میں دھوکہ دہی کا الزام لگاتے ہوئے سماج وادی پارٹی کے سربراہ اکھلیش یادو

سوال میں دم ہے! اور جواب؟! اسے کہتے ہیں، گھر کا بھیدی لَنکا ڈھائے!!

 

٭پاکستان کی فوج کے سربراہ جنرل عاصم منیر نے کہا ہے کہ انہیں کسی کا کوئی خط نہیں ملا اور اگر ملا بھی تو وہ نہیں پڑھیں گے۔ واضح رہے کہ جیل میں قید پاکستان کے سابق وزیرِ اعظم عمران خان کا کہنا ہے کہ وہ جنرل عاصم منیر کو دو مرتبہ کھلا خط لکھ چکے ہیں۔ اس خط کے متن کو عمران خان کے سوشل میڈیا اکاؤنٹس پر بھی شیئر کیا گیا ہے ۔۔۔ وائس آف امریکہ اردو

خان صاحب  جنرل کے مزاج سے واقف ہیں پر کیا کریں

بس اک شوق ہے لکھنے کا روز لکھتے ہیں

ہمیں پتہ ہے وہ ہر خط پڑھا نہیں کرتے

 

٭مہا کمبھ کے دوران اکیلے پریاگراج نے جی ڈی پی کی شرح نمو میں 3 لاکھ کروڑ روپے کی مدد کی۔ سیاحت ایک ایسا شعبہ ہے جہاں 49 فیصد سرمایہ کاری روزگار پیدا کرنے کے لیے خرچ کی جاتی ہے۔ یہاں ٹیکسی ڈرائیوروں، رکشہ ڈرائیوروں، اور بہت کچھ کے لیے روزگار کے بہت سے مواقع پیدا ہوئے، ہمارے ملک کی اقتصادی ترقی براہ راست انفراسٹرکچر سے جڑی ہوئی ہے ۔۔۔ لکھنؤ میں ایک عوامی اجتماع سے خطاب کرتے ہوئےمرکزی وزیر نتن گڈکری

اگر ایسا ہے تو کیوں نہ ترقی کے لیے تعلیم ٹکنالوجی وغیرہ کے تمام پراجکٹس پر تالہ لگا کر صرف مذہبی سیاحت کو فروغ دیا جائے! اس سے ایک تو سیاسی فائدہ بھی حاصل ہوگا اور جی ڈی پی کی شرح نمو بھی بڑھے گی! کیا سمجھے!!

 

٭وزیر اعظم نریندر مودی نے اقتدار سنبھالتے ہی ملک میں کھیلوں کے تئیں ماحول بدل دیا ہے اور ملک میں کھیلوں کیلئے مہیا سہولیات میں بے مثال اضافہ ہوا ہے ۔۔۔  مرکزی وزیر داخلہ امت شاہ

صاحب نے بے شک کھیل کے تئیں ماحول بدل دیا ہے، بقول شاعر

جو کھیل جانتے ہیں ان کے اور ہیں انداز

بڑے سکون بڑی سادگی سے کھیلتے ہیں

 

٭کیلیفورنیا ہمیں فروخت کر دیں’، ڈنمارک کے شہریوں کی ٹرمپ سے اپیل، امریکی صدر ڈونلڈ ٹرمپ کے ڈنمارک میں ایک خود مختار جزیرے گرین لینڈ کو خریدنے کے منصوبے کے جواب میں ڈنمارک کے شہریوں نے انہیں "کیلیفورنیا ” فروخت کرنے کا مشورہ دیا ہے ۔۔۔ ڈی ڈبلیو اردو

اسے کہتے ہیں جیسے کو تیسا جواب! کیا کہنے خوب!!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اسانغنی مشتاق رفیقی، وانم باڑی

٭یہ ایک تاریخی جیت ہے۔ یہ عوام کے اعتماد کی جیت ہے اور غریبوں کے لیے پی ایم مودی کی مسلسل کوششوں کا ثبوت ہے۔ یہ پی ایم مودی کے ویژن کی جیت ہے۔ یہ شکست ڈرامے، جھوٹ اور ٹوٹے ہوئے وعدوں کی ہےدہلی کے عوام نے ‘شیش محل’ ڈکٹیٹر اور کرپشن کے شہنشاہ اروند کیجریوال کو آئینہ دکھا دیا ہے ۔۔۔ دہلی اسمبلی انتخابات میں شاندار جیت پر بی جے پی کے قومی جنرل سکریٹری ترون چُگ

جب پروپگنڈے کا جادو سر  چڑ کر بولنے لگتا ہے تو ایسا ہی ہوتا ہے، عوام کا کیا ہے وہ تو بقول شاعر

یہ لوگ پاؤں نہیں ذہن سے اپاہج ہیں

ادھر چلیں گے جدھر رہنما چلاتا ھے

 

٭کانگریس کے سابق صدر اورایوان زیریں- لوک سبھا میں اپوزیشن لیڈر راہل گاندھی نے مہاراشٹر اسمبلی انتخابات میں ووٹر لسٹ کے ساتھ چھیڑ چھاڑ کا الزام لگاتے ہوئے الیکشن کمیشن سے مہاراشٹر میں ہونے والے لوک سبھا اور اسمبلی انتخابات کے ووٹروں کی تفصیلی فہرست مانگی ہے اور کہا ہے کہ اگر فہرست دستیاب نہیں کرائی گئی تو اس معاملہ کو عدالت میں چیلنج کیا جائے گا جمعہ کو یہاں ایک پریس کانفرنس سے خطاب کرتے ہوئے مسٹر گاندھی نے کہا کہ مہاراشٹر کی ووٹر لسٹ میں بڑے پیمانے پر تضادات پائے گئے ہیں، اس لیے کانگریس اور ریاست کی تین اہم اپوزیشن جماعتوں نے مہاراشٹر کے انتخابات کے لیے ووٹروں کی متفقہ اور حتمی فہرست(یونیفائیڈ ووٹر لسٹ) کا مطالبہ کیا ہے، جس پر لوک سبھا اور اسمبلی میں ووٹنگ ہوئی تھی۔۔۔ یو این آئی اردو

بیچارا راہل! جب آوے کا آوا ہی بگڑ چکا ہو، فسطائیت کی سونامی میں صداقت کا سمندر کھو گیا ہو  تو کوئی کتنا بھی چلا لے کچھ نہیں ہونے والا! ہائے افسوس!

 

٭امریکہ کے صدر ڈونلڈ ٹرمپ نے اسرائیلی وزیرِ اعظم بینجمن نیتن یاہو سے ملاقات کے بعد مشترکہ نیوز کانفرنس میں کہا کہ امریکہ غزہ کاانتظام سنبھال لے گا اور ہم اس پر کام بھی کریں گے۔ انہوں نے کہا کہ وہ غزہ کی ترقی چاہتے ہیں۔ صدر ٹرمپ نے کہا کہ غزہ بہت ہی خوب صورت علاقہ ہے جسے تعمیر کرنا اور وہاں ہزاروں ملازمتیں پیدا کرنا بہت ہی شان دار ہو گا۔۔۔ وائس آف امریکہ اردو

ستم ظریف زمانے کی ہائے نیرنگی

یزیدِ وقت مدینہ سنوارنے نکلا

 

٭ ریزرو بینک آف انڈیا کی مانیٹری پالیسی کمیٹی نے تقریباً پانچ سالوں میں پہلی بار ریپو ریٹ میں 25 بیسس پوائنٹس کی کمی کرنے اور مانیٹری موقف کو ’غیر جانبدار‘ رکھنے کا فیصلہ کیا، جس سے ہوم لون، کار لون اور دیگر قرضوں کے سستے ہونے کی امیدیں بڑھ گئی ہیں۔۔۔ یو این آئی اردو

یعنی عوام کو ایک اور لالی پپ! قرض سستے کرکے سود کی پیداوار میں اضافہ کیا گیا ہے! لوگوں میں قوت خرید بڑھانے کے لئے کوئی اسکیم وضع نہیں کی گئی ہے! کیا نیتی ہے ، خوب!!

 

٭ہم اس کی مذمت کرتے ہیں۔ ہو سکتا ہے وہ (غیر قانونی ہندوستانی تارکین وطن) مناسب دستاویزات کے بغیر وہاں گئے ہوں، لیکن کیا یہ انسانوں کے ساتھ سلوک کرنے کا طریقہ ہے؟ یہ قابل مذمت ہے۔ گھنٹوں تک ان کی ٹانگوں میں زنجیریں ڈالی گئیں اور ان پر تشدد کیا گیا۔ کوئی مہذب حکومت ایسا نہیں کر سکتی، لیکن ٹرمپ حکومت نے ایسا کیا ہے ۔۔۔ امریکہ سے غیر قانونی ہندوستانی تارکین وطن کی ملک بدری پر سی پی آئی کے جنرل سکریٹری ڈی راجہ

سرمایہ پرست معاشرہ اور اس کا مقتدر طبقہ  چاہے کتنا بھی مہذب کیوں نہ اپنے آپ کو باور کرائیں ان کی فطرت گھٹیا نفرت و تعصب سے پر ہوتی ہے اور جیسے ہی موقع ملتا ہے یہ صفات رذیلہ چھلک جاتی ہیں۔ سمجھا کریں!!

 

٭امریکی صدر ڈونلڈ ٹرمپ نے ایک ایگزیکٹو آرڈر پر دستخط کیے ہیں جس کے ذریعے بین الاقوامی فوجداری عدالت پر امریکہ اور اسرائیل کے خلاف ناجائز اور بے بنیاد اقدامات کا الزام لگاتے ہوئے ادارے پر پابندیاں عائد کی گئی ہیں۔ یہ اقدام ان افراد پر مالی اور ویزا پابندیاں عائد کرتا ہے جو امریکی شہریوں یا امریکی اتحادیوں اور ان کے اہل خانہ کے بارے میں آئی سی سی کو تحقیقات میں مدد کرتے ہیں۔۔۔ بی بی سی نیوز اردو

الٹا چور کتوال ڈانٹے!!

 

٭ راشٹریہ جنتا دل کے منوج کمار جھا نے راجیہ سبھا میں ملک میں بڑھتی ہوئی آمدنی میں عدم مساوات پر تشویش کا اظہار کیا اور اس معاملے پر حکومت سے فوری مداخلت کا مطالبہ کیا مسٹر جھا نے ایوان میں زیرو آور کے دوران "چیئرمین کی اجازت سے اٹھائے گئے معاملات” کے تحت کہا کہ متوسط ​​اور نچلے طبقے کی آمدنی مسلسل کم ہو رہی ہے۔۔۔ یو این آئی اردو

نیتا جی! مقتدر طبقہ چاہتا بھی یہی ہے تاکہ متوسط اور نچلے اپنے مسائل میں الجھے رہیں،اگر ان کا پیٹ بھر گیا تو یہ سوال کھڑی  کرنے لگیں گے! سمجھا کریں!!

 

٭ ایک چیز آپ کو سمجھنے کی ضرورت ہے کہ اس حکومت کی بنیادی توجہ ہمیشہ ترقی پر ہے، تاہم، اس بار، ترقی پر سمجھوتہ کیے بغیر، عام آدمی کی کھپت پر خاص توجہ دی گئی ہے، خاص طور پر اس بات کو یقینی بنانے میں کہ زیادہ پیسہ ان کے ہاتھ میں رہے تاکہ معیشت میں مزید حرکت ہو۔ ریپو ریٹ میں کمی اور اس سمت میں ایک اور اہم قدم ہے ۔۔۔ بی جے پی ایم پی وویک ٹھاکر

جھوٹ بھی سچ کی طرح بولنا آتا ہے اسے

کوئی لکنت بھی کہیں پر نہیں آنے دیتا

 

٭پاکستان میں حال ہی میں باہمی سیاسی اختلافات کے باوجود قومی اسمبلی کے منتخب ارکان میں اپنی تنخواہیں بڑھا کر تقریباﹰ تین گنا کر دینے پر اتفاق ہو گیا، جبکہ عام شہری اب بھی مہنگائی اور ٹیکسوں کے بوجھ تلے دبے ہوئے ہیں ۔۔۔ ڈی ڈبلیو اردو

اب اس پہ کیا کہیں!بس ندا فاضلی کا ایک شعر حاضر ہے تھوڑی ترمیم کے ساتھ

نیتا بھی سکوں سے ہے لیڈر بھی سکوں سے

انسان پریشان یہاں بھی ہے وہاں بھی

 

٭ آج، این ڈی اے کے تمام معزز ممبران پارلیمنٹ نے وزیر اعظم مودی سے ملاقات کی۔ بہار کے لیے ان کا آشیرواد ہمیشہ موجود ہے، اور آج کی میٹنگ سے صاف ظاہر ہوتا ہے کہ وہ بہار کی ترقی اور ورثے کو کتنی اہمیت دیتے ہیں ۔۔۔ مرکزی وزیر نتیا نند رائے

انتخابات کے قریب ریاستوں پر صاحب کی کرپا ایسے ہی برپا ہوتی ہے!

دے رہے ہیں وہ روز آ شرواد

کچھ پتہ تو کرو چناؤ ہے کیا

 

٭ حکومت نے کہا ہے کہ صحت کی سہولیات کا فائدہ ملک میں دور دراز علاقوں میں بھی خواتین، بچے اور تمام ضرورت مند کو ملے اس کے لئے کوششیں کی جارہی ہیں اور حاملہ خواتین کی دیکھ بھال کے لیے تمام ضروری قدم اٹھائے جارہے ہیں لوک سبھا میں ایک ضمنی سوال کے جواب میں صحت اور خاندانی بہبود کی وزیر مملکت انوپریہ پٹیل نے کہا کہ قومی صحت مشن کے تحت ملک میں چلائے جا رہے پروگراموں کے تحت دور دراز علاقوں میں خواتین اور بچوں کو بہت فائدہ ہو رہا ہے اور لوگوں کو صحت کے شعبے میں گھر بیٹھے سہولیات مل رہی ہیں۔۔۔ یو این آئی اردو

ہم کو معلوم ہے جنت کی حقیقت لیکن

دل کے خوش رکھنے کو غالبؔ یہ خیال اچھا ہے

 

٭ بنگلہ دیش میں سینکڑوں مظاہرین نے دارالحکومت ڈھاکہ میں ملک کے بانی شیخ مجیب الرحمان کے گھر کو نذرِ آتش کر دیا ہے۔ شیخ مجیب کو 1975 میں اسی گھر میں قتل کر دیا گیا تھا۔ بعدازاں اُن کی صاحب زادی شیخ حسینہ نے اسے میوزیم میں تبدیل کر دیا تھا۔ یہ حملہ ایک ایسے وقت ہوا ہے جب بھارت میں موجود شیخ حسینہ اپنے حامیوں سے آن لائن خطاب کرنے کی منصوبہ بندی کر رہی تھیں۔ شیخ حسینہ گزشتہ برس اپنی حکومت کے خلاف ہونے والے احتجاج کے بعد ملک چھوڑ کر بھارت منتقل ہوگئی تھیں اور اس کے بعد سے ان کا قیام نئی دہلی میں ہے۔۔۔ وائس آف امریکہ اردو

ہائے ہائے  !! بشیر بدر نے بجا فرمایا تھا

شہرت کی بلندی بھی پل بھر کا تماشا ہے

جس ڈال پہ بیٹھے ہو وہ ٹوٹ بھی سکتی ہے

 

٭ صاف پانی عوام کا حق ہے، لوگوں کو صاف پانی کی فراہمی میں دشواری پیدا کرنے والوں کے خلاف کارروائی کی جانی چاہیے اور اس لیے مہاراشٹر حکومت ایک قانون لا رہی ہے جس کے تحت آلودگی پھیلانے والوں کے خلاف کارروائی کی جائے گی، ہم نے اس کے لیے تمام اسٹیک ہولڈرز کے ساتھ میٹنگ کی ہے اور پھر قانون اور عدلیہ کی رائے بھی لی جائے گی اور پھر ہم بجٹ اجلاس کے بعد اس پر کام کریں گے، جی بی ایس وائرس  سے پریشان ہونے کی ضرورت نہیں ہے، ہم صورتحال پر قابو پانے کے لیے کام کر رہے ہیں ۔۔۔  جی بی ایس وائرس  کے پھیلنے پر، مہاراشٹر کے وزیر صحت، پرکاش ابیتکر

بے شک جی بی ایس وائرس  سے پریشان ہونے کی ضرورت نہیں ہے! آج یا کل اس پر قابو پالیا جائے گا پر فسطائیت اور اکثریت پرستی کا جو وائرس معاشرے کو مکمل اپنی گرفت میں لے چکا ہے اس کا علاج کب ہوگا منتری جی!

 

٭بی جے پی اور این ڈی اے، بی جے پی اور جے ڈی یو، یا ہماری کسی بھی اتحادی پارٹی کے درمیان کوئی الجھن نہیں ہے۔ ہم مضبوطی سے آگے بڑھ رہے ہیں، اور این ڈی اے سی ایم نتیش کی قیادت میں الیکشن لڑے گا۔۔۔ بہار: وزیر اشوک چودھری

اقتدار کی دوڑی ایسے ہی کمال کی ہوتی ہے وہ سب کو باندھ کے رکھتی ہے پر جب وہ توٹتی ہے تو اچھے اچھوں کی کس بل نکال دیتی ہے!! کیا سمجھے !!

 

٭یورپی کمیشن کی سربراہ ارزولا فان ڈیئر لائن نے کہا ہے کہ امریکی صدر ڈونلڈ ٹرمپ کی ’امریکہ فرسٹ‘ پالیسیوں اور دیگر متحارب طاقتوں کے سامنے یورپی یونین کو عالمی سطح پر مزید حقیقت پسند ہونے کی ضرورت ہے۔۔۔ ڈی ڈبلیو اردو

جو ہم پہ گزرے تھے رنج سارے جو خود پہ گزرے تو لوگ سمجھے

جب اپنی اپنی محبتوں کے عذاب جھیلے تو لوگ سمجھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اسانغنی مشتاق رفیقی، وانم باڑی

٭میں نے ملک کو وکست بھارت کے لئے چار ستونوں غریب، کسان، نوجوان اور ناری شکتی کو مضبوط کرنے کی گارنٹی دی تھی۔ کل جو بجٹ پیش کیا گیا وہ مودی کی ان ضمانتوں کو پورا کرنے کا ثبوت ہے۔ پچھلے سالوں میں ہم نے غریبوں کو مفت کھانا مفت صحت اور مستقل رہائش فراہم کئے ہیں، آپ نے کل کے بجٹ کی کوریج ٹی وی پر دیکھی ہوگی اور آج تمام اخبارات بھرے پڑے ہیں۔ اس کی وجہ یہ ہے کہ یہ بجٹ عوام کے لیے ہے، ایک ایسا بجٹ جو شہریوں کی امنگوں کی عکاسی کرتا ہے۔۔۔ وزیرِ اعظم نریندر مودی

کیونکہ صاحب نے کہا ہے اس لئے بقول راحت اندوری

ہم اپنے شہر میں محفوظ بھی ہیں خوش بھی ہیں

یہ سچ نہیں ہے مگر اعتبا ر کرنا ہے

 

٭وزیر اعظم نریندر مودی نے یہ کہتے ہوئے کہ جھاڑو کے تنکے بکھر رہے ہیں اور عآپ نے دہلی کے 11 سال برباد کیے، لوگوں سے بی جے پی کو ووٹ دینے کی اپیل کی ۔۔۔ اے این آئی

صاحب جی جھاڑو کےتنکے اگر بکھر بھی جائیں تو انہیں جوڑ کر پھر سے جھاڑو بنایا جاسکتا ہے لیکن کنول اگر بکھر جائے، سوکھ جائے یا سڑ جائے تو اسے پھر سے اپنے اصل پر واپس لانا ناممکن ہے! یاد رہے!!

 

٭ کینیڈا کا امریکہ کے خلاف جوابی 25 فیصد محصولات عائد کرنے کا اعلان چین اور میکسیکو بھی ناراض ، وائٹ ہاؤس نے تصدیق کی ہے کہ صدر ٹرمپ نے چین کینیڈا اور میکسیکو سے درآمدات پر 25 فیصد اور چین سے درآمدات پر 10 فیصد اضافی ٹیرف لاگو کرنے کے حکم نامے پر دستخط کر دیے ہیں۔ جبکہ تینوں ممالک نے اس اقدام پر ناراضگی کا اظہار کیا ہے۔ کینیڈا کے وزیر اعظم جسٹس ٹروڈو نے اعلان کیا ہے کہ کینیڈا 155 ارب ڈالر کی امریکی مصنوعات پر 25 فیصد محصولات عائد کر رہا ہے ۔۔۔ بی بی سی اردو

نپے تلے آہنگ پہ کب تک سنبھل سنبھل کر رقص کریں

کوئی دھن دیوانی کوئی حرکت مجنونانا بھی

 

٭دبئی کے ولی عہد اور متحدہ عرب امارات کے نائب وزیرِ اعظم اور وزیرِ دفاع عزت مآب حمدان بن محمد سے مل کر خوشی ہوئی۔ ہماری دوستی کے گہرے بندھنوں اور انہیں اپنے لوگوں کی بھلائی کے لیے آگے لے جانے پر گرمجوشی سے گفتگو  ہوئی ۔۔۔ وزیر خارجہ ایس جے شنکر

گھر میں مسلمانوں کو ہمیشہ حاشیے میں رکھنا مگر باہر عرب شیوخ کو سر آنکھوں پر بٹھانا اسے ہی تو کہتے ہیں

گڑ کھانا پر گُلگُلوں سے پرْہیز کَرنا

 

٭اپوزیشن کو اپنا کردار تعمیری انداز میں ادا کرنا چاہیے۔ ایوان کے اندر افراتفری پھیلانا اور غنڈہ گردی کا سہارا لینا غلط ہے ۔۔۔ راجستھان اسمبلی اجلاس کو لے کر بی جے پی کے ریاستی صدر مدن راٹھور

دوسروں کو نصیحت خود مِیاں فَضِیحَت

 

٭عرب وزرائے خارجہ کے مطابق وہ دو ریاستی حل کی بنیاد پر مشرقِ وسطیٰ میں منصفانہ اور جامع امن کے لیے ٹرمپ حکومت کے ساتھ کام کرنے کے لیے تیار ہیں۔۔۔ وائس آف امریکہ اردو

میر کیا سادے ہیں بیمار ہوئے جس کے سبب

اسی عطار کے لڑکے سے دوا لیتے ہیں

 

٭سابق رکنِ پارلیمنٹ ادت راج کی قیادت میں کانگریس کارکنوں نے عام آدمی پارٹی (اے اے پی) کے قومی کنوینر اروند کیجریوال کے گھر کے باہر احتجاج کیا اور پنجاب کے امرتسر میں بابا صاحب ڈاکٹر بھیم راؤ امبیڈکر کے مجسمے کو توڑے جانے پر ان سے معافی کا مطالبہ کیا ۔۔۔ یو این آئی اردو

ایک طرف کانگریس مسلسل یلغار کر رہی ہے اور ایک طرف بی جےپی بڑے بڑے توپ برسا رہی ہے، بیچ میں بیچارے مفلر انکل جھاڑو کی ڈھال لئے اپنا بچاؤ کر رہے ہیں! اب کریں بھی تو کیا کریں! ہائے ہائے!!!

 

٭ وزیرِ اعظم نریندر مودی نے عام آدمی پارٹی ( آپ ) اور کانگریس پر اس صدی کے پہلے 25 سال دہلی میں اقتدار میں رہ کر دارالحکومت کو برباد کرنے کا الزام لگایا اور کہا کہ اس بار دہلی اس سے مایوس ہے، یہی وجہ ہے کہ اسمبلی انتخابات میں شکست کے خوف سے حکمراں عآپ چاہتی ہے کہ کانگریس ان علاقوں میں جیت جائے جہاں اس کے امیدوار نہیں جیت سکے، تاکہ وہ پھر اکٹھے ہو کر حکومت بنا سکیں ۔۔۔ یو این آئی اردو

صاحب جی! دلی والے بہت سیانے ہیں وہ سب جانتے ہیں کہ کون کیا ہے اور کون کب کیا کرے گا بقول کیف بھوپالی

جناب کیفؔ یہ دلی ہے میرؔ و غالبؔ کی

یہاں کسی کی طرف داریاں نہیں چلتیں

 

٭ امریکی کمپنی ٹیسلا اور اس کے چینی حریف بی وائے ڈی نے سال 2024 کے چوتھے سہ ماہی میں مجموعی طور پر 3.5 ملین الیکٹرک گاڑیاں فروخت کیں ۔۔۔ ڈی ڈبلیو اردو

یعنی بہت قریب میں پٹرول کی دولت اور اس پر کی جانے والی عیاشیاں سب خواب بننے والی ہیں!! زمانے کا یہ الٹ پھیر بھی خوب رہے گا!!

 

٭جب اتنے سالوں بعد ایودھیا میں رام للا کا قیام عمل میں آیا، تب بھی سماج وادی پارٹی (ایس پی) نے اس کی مخالفت کی تھی۔ پچھلے دو مہینوں میں ایس پی چیف کے تمام ٹویٹس مہا کمبھ کے خلاف ہیں جو اس صدی کا سب سے بڑا روحانی اور ثقافتی میلہ ہے،اب تک 34 کروڑ عقیدت مند تروینی سنگم میں مقدس ڈبکی لگا چکے ہیں ۔۔۔ ملکی پور میں ضمنی انتخاب سے قبل جلسہ عام سے خطاب کرتےہوئے یوپی کے سی ایم یوگی آدتیہ ناتھ

اتنے سالوں سے حکومت میں رہنے کے باوجود بیچارے مکھیہ منتری جی کے پاس عوام کو دینے لئے سوائے دھرم کے کوئی اور چورن ہی نہیں ہے! افسوس صد افسوس !!!

 

٭ عام آدمی پارٹی (اے اے پی) کے قومی کنوینر اروند کیجریوال نے کہا کہ بھارتیہ جنتا پارٹی (بی جے پی) کو اپنے کام کی بنیاد پر الیکشن لڑنا چاہئے لیکن وہ دہلی کے لوگوں کو بیمار کرکے الیکشن لڑنا چاہتی ہے۔۔۔ یو این آئی اردو

مفلر انکل وہ دن لد گئے جب کام کی بنیاد پر الیکشن لڑے جاتے تھے اب یہ امرت کال ہے اس میں لوگوں کو ذہنی بیمار کر کے ہی الیکشن لڑا اور جیتا جاسکتا ہے! سمجھا کریں!!

 

٭ گیس، تیل اور نایاب وسائل سے مالا مال گرین لینڈ آج کل خبروں کی زینت بنا ہوا ہے۔ وجہ ہے امریکی صدر ڈونلڈ ٹرمپ کی اس جزیرے میں دلچسپی۔ یہاں کے قدرتی وسائل کے حصول کا لالچ البتہ اس جزیرے کا منفرد ماحول تباہ کر سکتا ہے ۔۔۔ ڈی ڈبلیو اردو

سرمائے میں اضافہ کے لئے قدرتی وسائل کا استحصال ہی سرمایہ دار  اور سرمایہ پرستوں کا  پہلا اور آخری منشا ہوتا ہے اور اگر اس کی وجہ سے ساری دنیا فنا بھی ہوجائے تو اپنی بلا سے، سمجھا کرو!!

 

٭ہمیں عوام کی آواز پر توجہ دینے کا راستہ تلاش کرنا چاہیے ۔۔۔ مرکزی بجٹ 2025-26 پر ایک نجی میڈیا کو اپنے پہلے ویڈیو انٹرویو میں، مرکزی وزیرِ خزانہ نرملا سیتا رمن

یہ سارے لوگ تو شامل تھے لوٹنے میں مجھے

سنا ہے اب مری امداد کرنا چاہتے ہیں

 

٭بہار میں الیکشن ہیں (اسمبلی الیکشن 2025)۔ مودی حکومت کے تمام بجٹ انتخابات کے لیے ہوتے ہیں۔ یہ ایک انتخابی پیکیج ہے۔ یہ ملک کا بجٹ نہیں ہے ۔۔۔ بہار کے لیے خصوصی اعلانات پر شیو سینا (یو بی ٹی) کے رہنما سنجے راوت

بات تو سچ ہے مگر بات ہے رسوائی کی

 

٭ایک نئی تحقیق سے معلوم ہوا ہے کہ زندگی کا جنم زمین پر نہیں ہوا بلکہ یہ کہیں باہر سے آئی تھی اور پھلنے پھولنے کے لیے اسے یہاں ایک سازگار ماحول ملا۔ زمین پر زندگی کے لیے ایک سازگار ماحول تو موجود ہے لیکن سائنس دانوں کا کہنا ہے کہ یہاں زندگی خلا سے آئی ہے ۔۔۔ وائس آف امریکہ اردو

تحقیق اپنی فطرت کی طرف رواں دواں ہے،  دیکھنا ایک دن ایسا بھی آئے گا جب باطل و الحاد کے پیغامبر خود حق کی گواہی دیں گے،  ان شاءاللہ!!

اسانغنی مشتاق رفیقی، وانم باڑی

 

٭ قومی ووٹرز ڈے ہماری متحرک جمہوریت کو منانے اور ہر شہری کو اپنا حق رائے دہی استعمال کرنے کا اختیار دینے کے بارے میں ہے۔ یہ قوم کے مستقبل کی تشکیل میں شرکت کی اہمیت کو اجاگر کرتا ہے۔ ہم اس سلسلے میں ای سی آئی اور اس کی  مثالی کوششوں کی تعریف کرتے ہیں ۔۔۔ وزیر اعظم نریندرمودی

زیادہ خوش فہمی میں مبتلا ہونے کی ضرورت نہیں ہے!! یہ ہاتھی کے دکھانے والے دانت ہیں، کھانے کے دانت تو اور ہیں! سمجھا کریں!!

 

٭ بہار میں الیکشن  کے اعلان کےساتھ ہی لوگ ہر دو دن بعد آتے رہیں گے۔ ان لوگوں کو بہار کی ترقی کی کوئی پرواہ نہیں ہے، انہیں صرف الیکشن اور اقتدار میں رہنے کی فکر ہے۔ انتخابات کے دوران بڑے بڑے وعدے کیے جائیں گے، لیکن اس کے بعد کچھ نہیں بدلے گا، وہ یہاں کام کرنے کے لیے نہیں صرف جھوٹی یقین دہانیوں کے لیے آتے ہیں ۔۔۔ وزیر اعظم مودی کے آنے والے بہار کے دورے پر آر جے ڈی لیڈر تیجسوی یادو

جس طرح سیاست دانوں کو صرف الیکشن اور اقتدار کی فکر رہتی ہے اسی طرح آج کل عوام کے ایک بڑے حصے کی سوچ میں اپنی ذات اور مذہب کا جادو سر چڑھ کر بولتا ہے، ایسے میں ترقی کی پرواہ کون کرے گا یادو جی!!

 

٭ پاکستان کے صوبہ بلوچستان کے شہر کوئٹہ میں واقع ‘جبلِ نور القرآن’ سے 120 قدیم اور نایاب قرآنی نسخے چوری ہو گئے ہیں ۔چوری شدہ نسخوں میں 600 سے 700 سال پرانے بعض ہاتھ سے تحریر کردہ نسخے بھی شامل ہیں ۔۔۔ وائس آف امریکہ اردو

لگتا ہے نام نہاد سلطنتِ خداداد کا آوے کا آوا ہی بگڑا ہوا ہے، نہ یہاں اب انسان محفوظ ہے اور نہ ایمان نہ قرآن! اللہ رحم کرے!!

 

٭ انہوں نے (اروند کیجریوال) وعدہ کیا تھا کہ اگر اے اے پی نے حکومت بنائی تو وہ ایک دلت نائب وزیرِ اعلیٰ کا تقرر کریں گے۔ 10 سال ہو چکے ہیں، اور دہلی کے لوگ اب بھی ایک دلت نائب وزیرِ اعلیٰ کا انتظار کر رہے ہیں ۔۔۔ مرکزی وزیرِ داخلہ امت شاہ

شاہ جی! مفلر انکل بھی سب سیاست دانوں کی طرح ایک سیاست دان ہی ہیں بس!! بقول شاعر

صرف بھاشن ہیں میرے سب وعدے

جیت کر سب میں بھول جاتا ہوں

 

٭ مجھے یونین بجٹ سے کوئی امید نہیں ہے۔ ہم نے ‘موڈینومکس’ کے 11 سال دیکھے ہیں اور اس کا کیا نتیجہ نکلا ہے؟ اس کے نتیجے میں روپیہ سب سے کمزور ہوا ہے۔ پٹرول اور ڈیزل کی قیمتیں بڑھ رہی ہیں۔ ٹیکس فارمولوں نے متوسط طبقے اور کاروباری طبقے کو تباہ کر دیا ہے۔  روزگار نہیں ہے ، زرعی پیداوار اور  ایف ڈی آئی اپنی کم ترین سطح پر ہیں۔ لوگ ملک سے پیسہ باہر لے جا رہے ہیں۔ صرف جنوری کے مہینے میں بیرونی ممالک کی جانب سے 9 بلین ڈالر سے زیادہ کی سرمایہ کاری نکالی گئی ہے ۔۔۔ مرکزی بجٹ پر کرناٹک کے وزیر پرینک کھرگے

کھرگے جی! یہ کیا مایوسی کی باتیں پھیلانے لگے ہو! کیا صاحب اور ان کی پارٹی کے لوگ جھوٹے ہیں جو یہ دعویٰ کرر ہے ہیں کہ ان کی وجہ سے بھارت امرت کال میں پرویش کرچکا ہے؟!

 

٭ روسی حکومت کے مطابق صدر پوٹن اپنے امریکی ہم منصب ڈونلڈ ٹرمپ سے بات کرنے کے لیے تیار ہیں لیکن وہ پہلے واشنگٹن کی طرف سے اس سلسلے میں اشارے کا انتظار کر رہے ہیں۔ صدر ٹرمپ نے بھی صحافیوں کو بتایا تھا کہ وہ بہت جلد پوٹن سے ملاقات کریں گے ۔۔۔ وائس آف امریکہ اردو

ایک منجھے ہوئے سخت گیر عیار سیاست داں اور سرمایہ پرست کاروباری جنونی اگر ملیں گے تو کیا گل کھلائیں گے، اور فائدے میں کون زیادہ رہے گا! یہ ایپی سوڈ یقیناً دیکھنے  لائق ہوگا!! انتظار کریں!!!

 

٭جب جموں و کشمیر کے میر واعظ فاروق کو میٹنگ میں بلایا گیا تو اپوزیشن لیڈروں نے میٹنگ روکنے کے لیے بدتمیزی شروع کردی،جے پی سی کو سرمائی اجلاس تک رپورٹ پیش کرنی تھی، اب ہم نے کل بجٹ اجلاس کی رپورٹ پیش کرنے کے لیے میٹنگ کی تھی۔ اس سے پہلے ٹی ایم سی کے رکن پارلیمنٹ کلیان بنرجی نے بھی میٹنگ کے دوران بوتلیں پھینکیں۔ ان میٹنگس کو روک کر رپورٹ میں تاخیر کرنا ان کی سوچی سمجھی حکمت عملی ہے۔ کل کی میٹنگ میں گواہوں کو جرح کے لیے بلایا گیا تھا لیکن ان کے جھگڑے اور لڑائی کی وجہ سے میٹنگ شروع بھی نہ ہو سکی ۔۔۔ جے پی سی کی میٹنگ پر، وقف (ترمیمی) بل 2024 جے پی سی کے چیئرمین، اور بی جے پی کے ایم پی، جگدمبیکا پال

وہ تازہ دم ہیں نئے شعبدے دکھاتے ہوئے

عوام تھکنے لگے تالیاں بجاتے ہوئے

 

٭ آپ-دا پارٹی نے دہلی کے لوگوں کو بہت مشکل میں ڈال دیا ہے۔ دہلی بہت بدل گئی ہے، ہر طرف کچرے کے ڈھیر ہیں، دہلی کی سڑکیں ٹوٹی ہوئی ہیں۔ بدعنوانی کے معاملے پر الیکشن جیتنے والے شخص نے بدعنوانی کے تمام ریکارڈ توڑ ڈالے۔ اروند کیجریوال کئی گھوٹالوں میں ملوث ہیں۔ عآپ ایک کٹر بے ایمان پارٹی ہے ۔۔۔  بی جے پی کے قومی صدر جے پی نڈا

نیتا جی! آپ جہاں جہاں سرکار میں ہیں وہاں وہاں کے حزب اختلاف بھی آپ پر ایسے ہی الزامات دھرتے ہیں! اس پر آپ کیا کہنا چاہیں گے!!

 

٭ امریکی ریاست سیئیٹل کے ایک وفاقی جج نے والدین کی امیگریشن کی حیثیت سے قطع نظر پیدائشی حق شہریت کی آئینی ضمانت کو ختم کرنے کے ٹرمپ کے حکم کو عارضی طور پر روک دیا ہے۔ امریکی ڈسٹرکٹ جج جان کوفینور نے فیصلہ سنایا کہ صدر کی جانب سے امریکہ میں پیدا ہونے والے بچوں کو امریکی شہریت دینے سے انکار کرنے کی کوشش "پوری طرح سے غیر آئینی” ہے۔۔۔ ڈی ڈبلیو اردو

صدر کو بھی معلوم تھا کہ ان کے آرڈیننس کا حشر ایسا ہی ہوگا پر وہ تو اپنے بھگتوں کو خوش کرنا چاہتے تھے سو انہوں نے کردیا! اب اس حکم کے ساتھ کیا کرنا ہے وہ قانون جانے اور قانون کے رکھوالے جانیں، انہیں اس سے کوئی مطلب نہیں!! سمجھے!!

 

٭ آندھرا پردیش کانگریس کے صدر وائی ایس شرمیلا ریڈی نے آندھرا پردیش کے عوام سے ٹی ڈی پی کے ذریعہ کئے گئے "سپر سکس”  یعنی مفت بس کی سواری، تین مفت سلنڈر، 20 لاکھ نوکریاں، اور بے روزگار نوجوانوں کو 3000 روپے کا وظیفہ  جیسے وعدوں پر عمل درآمد کا مطالبہ کرنے کے لئے ‘تھالی باجو’ احتجاج کیا ۔۔۔ اے این آئی

بقول بھگتوں کے صاحب نے تھالی بجا کر کرونا بھگائی تھی  شاید اس سے متاثر ہو کر محترمہ نے یہ طریقہ اختیار کیا ہو! مگر یہاں کرونا کون ہے؟!

 

٭دہلی میں، عام آدمی پارٹی بھاری اکثریت کے ساتھ حکومت بنانے کے لیے تیار ہے، اور 60 سے زیادہ سیٹیں عام آدمی پارٹی جیتے گی ۔۔۔ عآپ  کے راجیہ سبھا رکن سنجے سنگھ

ساون کے اَندھے کو ہَرا ہی ہَرا سوجْھتا ہے

 

٭ دنیا سے جذام کی بیماری ختم کیوں نہیں ہو رہی؟ تمام تر سائنسی ترقی کے باوجود آج بھی سالانہ تقریباً دو لاکھ افراد جذام کی بیماری میں مبتلا ہو رہے ہیں۔ یورپ میں اس بیماری کو شکست دی جا چکی ہے لیکن دنیا کے متعدد غریب ممالک میں یہ اب بھی زندگیوں کو تباہ کر رہی ہے۔ دنیا بھر میں اس انفیکشن کی وجہ سے عمر بھر کے لیے معذور ہونے والے افراد کی تعداد تقریباً 30 لاکھ بنتی ہے ۔۔۔ ڈی ڈبلیو اردو

یہ بات یقیناً افسوسناک ہے کہ غریب ممالک میں اس بیماری پر قابو نہیں پایا جاسکا مگر یہ کہنا کہ یورپ نے اس بیماری کو شکست دے دی غلط ہے۔ بھلے سے انہوں نے ظاہری جذام سے خلاصی پالی ہو لیکن  ان کے یہاں ابھی بھی ذہنی جذام کے مریض بڑی تعداد میں پائے جاتے ہیں! کیا سمجھے!!

 

٭ اروند کیجریوال نے سیاست میں اپنے کیریئر کی شروعات ‘انڈیا اگینسٹ کرپشن’ کے بینر تلے کی تھی۔ اس وقت انا ہزارے سب سے آگے تھے، وہ لوک پال کے لیے لڑے اور یو پی اے حکومت نے لوک پال بنایا۔ لیکن اروند کیجریوال، جو لوک پال کی مدد سے بدعنوانی کو ختم کرنا چاہتے تھے اب اس کے بارے میں کچھ نہیں کر رہے ہیں۔ عآپ کے ساتھ ہمارا معاہدہ نظریاتی اور بی جے پی آر ایس ایس کے خلاف تھا اور یہ قومی سطح پر تھا۔ لیکن علاقائی سطح پر ہر پارٹی کو انفرادی طور پر الیکشن لڑنے کا حق حاصل ہے۔ انہیں ایماندار اور بے ایمان کی بات نہیں کرنی چاہئے کیونکہ سب جانتے ہیں کہ دوسرا شخص کہاں کھڑا ہے ۔۔۔  کانگریس نیتا دگ وجے سنگھ

اس کا مطلب ہے پردے کے پیچھے کچھ ہوچکا ہے یا ہورہا ہے یا ہونے والا ہے!! اور شاید یہی سیاست ہے!

سمجھنے ہی نہیں دیتی سیاست ہم کو سچائی

کبھی چہرہ نہیں ملتا کبھی درپن نہیں ملتا

 

٭ جموں و کشمیر کے وزیرِ اعلیٰ عمر عبداللہ کو اب مقبول مائیکروبلاگنگ ویب سائٹ ‘ایکس’ پر ایک سرکاری ہینڈل مل گیا ہے یہ اعلان وزیرِ اعلیٰ کے دفتر نے ‘ایکس’ پر ایک پوسٹ کے ذریعے کیا۔ انہوں نے پوسٹ میں کہا ‘ ہمیں یہ بتاتے ہوئے خوشی ہو رہی ہے کہ جموں و کشمیر کے وزیرِ اعلیٰ کا دفتر اب باضابطہ طور پر ‘ایکس’ پر ہے’ پوسٹ میں مزید کہا گیا کہ جموں و کشمیر خطے کی تشکیل کرتے ہوئے کلیدی اقدامات، پالیسیوں اور پیشرفت کے بارے میں اپ ڈیٹس کے لیے ہمارے ساتھ جڑے رہیں۔۔۔ یو این آئی اردو

یعنی بقول شاعر

تری نسبت سے شہرت کی بلندی پر پہنچنا ہے

ذرا آنچل کو سرکانا،مجھے اک شعر کہنا ہے

 

٭ فرانس کی ایک عدالت نے معزول شامی صدر بشارالاسد کے خلاف وارنٹ گرفتاری جاری کیا ہے ، ان پر جنگی جرائم میں مبینہ طور پر ملوث ہونے بالخصوص عام شہریوں پر جان بوجھ کر حملہ کرنے کے ا‍لزامات ہیں فرانسیسی عدلیہ نے، مجموعی طور پر شامی حکام کے لیے چودہ وارنٹ گرفتاری جاری کیے ہیں۔۔۔ ڈی ڈبلیو اردو

جب اقتدار ہاتھ سے چلی جاتی ہے تو دنیا کیسے  کیسے رنگ بدلتی ہے!! افسوس!! اِنَّ فِیۡ ذٰلِکَ لَاٰیٰتٍ لِّقَوۡمٍ یَّعۡقِلُوۡنَ۔ (یقناً اس میں عقلمند لوگوں کے لئے کئی ایک نشانیاں موجود ہیں۔)

…………………………..